“Për partitë tubime, për qytetarët dënime”.
Kjo fjali është shkruar me grafit nga anëtarë të Partisë Socialdemokrate, në murin e objektit të stacionit Qendra të Policisë në kryeqytet.
Për këtë 16 anëtarë të kësaj partie përfunduan në pranga, përfshirë edhe kryetarin e saj, Dardan Molliqaj.
Megjithëse vetë e miratuan ligjin, vetë edhe po e shkelin, por, sipas tyre, dënimet po shqiptohen vetëm për qytetarët.
“Kur zbatimi i ligjit është selektiv ai gjithmonë shkon në dobi të fortit e në kurriz të të dobëtit. Ligji është nxjerrë nga vet politikanët të cilët janë të partë e pothuajse të vetmit që haptazi nuk po e abuzojnë ligjin”, ka thënë Nol Nushi nga PSD-ja.
Në 24 orët e fundit të paktën tri parti politike kanë organizuar tubime në ambiente të mbyllura, në kundërshtim me masat anti-Covid.
Megjithëse kanë mbetur edhe tri javë deri në hapjen e fushatës zgjedhore, tubimet janë shpeshtuar, përfshirë edhe nga partia në pushtet, LDK, megjithëse gjatë të hënës u dënuan me 2 mijë euro për një tubim të mbajtur në kryeqytet.
Takimi i radhës ka qenë në Fushë-Kosovës, e me qytetarë takime kanë mbajtur edhe kreu i AAK-së, Ramush Haradinaj, dhe ai i Nismës, Fatmir Limaj.
Drejtori i Inspektoratit në Komunën e Prishtinës, Adonis Tahiri, thotë se do të gjobisin të gjitha partitë, të cilat hasen duke shkelur masat anti-Covid në tubimet e organizuara.
“Në asnjë formë nuk do të lejojmë diskriminim të tillë ku qytetarët dhe bizneset dënohen ditë e natë përderisa subjektet politike i shkelin ligjet të cilat vet i votojnë”, është shprehur Adonis Tahiri, drejtor i Inspektoratit komunal.
Ndërsa Inspektorati Sanitar nuk ka dhënë përgjigje nëse ka dënuar deri më tani ndonjë parti politike për tubimet e organizuara në komunat e tjera të Kosovës.
KOHA ka kërkuar sqarime nga IKSHPK-ja dhe Ministria e Shëndetësisë lidhur me tubimet e organizuara së fundi nga partitë politike, por edhe nëse do të ketë masa shtesë gjatë fushatës zgjedhore, por asnjëra prej institucioneve nuk ka kthyer përgjigje.
Thirrje për zbatimin e masave përmes Facebookut ka bërë ministri i Shëndetësisë, Armend Zemaj, derisa ka paralajmëruar edhe lehtësimin e tyre.
“Kosova, krahasuar me shtetet tjera, vazhdon të ketë situatë të mirë të menaxhimit të Covid 19. Statistikat nga ECDC, Kosovën e radhisin të fundit në rajon sa i përket shtrirjes së infeksionit si dhe vdekshmërisë nga Covid-19. Në takimin e sotëm me Bordin Këshillëdhënës kemi diskutuar për situatën epidemiologjike, duke parë mundësinë e lehtësimit të disa masave që janë në fuqi. Masat lehtësuese do të jenë vlerësim për respektimin e masave nga qytetarët. Bashkë ia dalim!”, ka shkruar ndër të tjera, Armend Zemaj.
Në anën tjetër, nga KQZ-ja nuk kanë dhënë detaje lidhur me masat që do të zbatohen gjatë fushatës zgjedhore dhe ditën e zgjedhjeve.
Në një përgjigje me shkrim nga institucioni është thënë se ditëve në vijim do të shohin nëse ka nevojë për përditësimin e masave që janë përdorur gjatë zgjedhjeve në Podujevë e Mitrovicë të Veriut, në nëntor të 2020-s.
© KOHA. Të gjitha të drejtat janë të rezervuara.
