Video

IKSHPK-ja e quan veten model për botën, por shpejt e fshiu vetëlavdërimin në Facebook

Instituti Kombëtar i Shëndetit Publik ka zgjedhur që disa orë para publikimit të raportit 24-orësh për të infektuar me COVID-19 të lavdërohet për punën që po e bën.

Rreth orës 11:00, në faqen e këtij Instituti në Facebook janë publikuar dy foto me një mbishkrim, ku tregohej se deri në atë orë janë testuar 257 persona dhe se është model për ekipet botërore. Por ky status është fshirë më pas nga faqja e IKSHPK-së.

E gjatë 24 orëve të fundit 6 persona të infektuar me COVID-19 kanë humbur jetën, duke e çuar totalin në 1 mijë e 363. Derisa nga 1 mijë e 417 mostra të testuara në laboratorin e IKSHPK-së e në ato private, 309 persona kanë rezultuar pozitivë.

Lëvdata për IKSHPK-në patën edhe qytetarët, të cilët u testuan për COVID-19 gjatë së enjtes.

“Shumë shpejt d.m.th. për 5 minuta, 3 minuta kryhet si procedure, vetëm më udhëzim të mjekut sot menjëherë kemi ardhur”, ka thënëqytetari Burim Binaku.

Numri total i rasteve pozitive ka arritur në mbi 52 mijë e 900, prej të cilëve mbi 44 mijë e 400 kanë arritur të shërohen.

Përveç rritjes së numrit të të infektuarve ditëve të fundit, vërehet rritje edhe në numrin e pacientëve që po trajtohen në klinikat e QKUK-së e në spitale regjionale. Gjatë së enjtes 502 persona kanë marrë trajtim spitalor, prej të cilëve 278 tashmë të konfirmuar me COVID-19.

Por alarmante e ka quajtur Dega për Evropë e Organizatës Botërore të Shëndetësisë përhapjen e variantit të ri të koronavirusit.

Përfaqësues të saj kanë thënë se është shqetësuese kjo përhapje e shpejtë e këtij varianti, derisa kanë bërë thirrje që të vazhdohet me mbajtjen e maskave, kufizimet e tubimeve, mbajtjes së distancës e higjienës.

Në Kosovë ende nuk është arritur që të konfirmohet ose jo ndonjë rast me variantin e ri të virusit, shkaku i mungesës së aparaturave për dedektimin e këtij mutacioni. Derisa është paralajmëruar dërgimi i mostrave në një nga laboratorët e Evropës.