Video

LVV-ja në KQZ kërkon aplikacion për votim elektronik nga jashtë

Nuk ka kaluar shumë kohë nga zgjedhjet në Podujevë e në Mitrovicë të Veriut, por institucioni që i organizon ato para vetes ka një detyrë më të madhe.

organizimi i zgjedhjeve të parakohshme parlamentare, sipas kryetares së KQZ-së, Valdete Daka, nuk do të jetë i lehtë, deklaratë që e arsyetoi para anëtarëve në mbledhjen e radhës.

“Për ne do të jetë sfiduese, pasi ne do të jemi i vetmi institucion që do të jemi në detyrë në ditët në vijim, po ashtu ne kemi një buxhet ende të paakumuluar. Edhe mundësitë tona kanë limite, prandaj ta kenë këtë parasysh”, tha Dak.

Debat më të madh në këtë mbledhje zgjoi propozimi i Lëvizjes Vetëvendosje, përmes anëtarit të saj Sami Kurteshi, i cili kërkoi që diasporës t’i mundësohet të votojë në mënyrë elektronike.

“Në pikëpamje teknike, në pikëpamje shkencore nuk është… nuk ka arsye juridike hidhet poshtë. Ka qenë në planin e punës së KQZ-së për këtë vit. Është investim kapital, ashtu qysh e tha edhe ai investim është 50.000-60.000 euro. Edhe e lehtëson punën e KQZ-së, sepse kontrollimi është elektronik, nuk është fizik”, ka deklaruar Kurteshi.
 

Përfaqësuesi i Lidhjes Demokratike të Kosovës, Sami Hamiti, në këtë komision ka thënë se kjo çështje duhet të rregullohet me ligj, megjithëse e konsideroi të pamundshme për zgjedhjet që po vijnë, e nuk pati kundërshtime për idenë as nga PDK-ja.

“Është çështje e cila tash është në procedurë të Kuvendit dhe besoj që pritet të merret me ligj dhe të përfundohet”, tha Hamiti.

PDK-ja mbështet çdo propozim që do të lehtësonte votimin nga jashtë.

“Sot në këto rrethana kur jemi afër zgjedhjeve unë mbështes idenë me të cilën do ta lehtësonim pjesëmarrjen e votuesve të diasporës përmes një ndryshimi qoftë në formular, qoftë në procedurë me të cilën do t’u hapim rrugë edhe votuesve nga diaspora”, është shprehur Arianit Elshani, anëtar i KQZ-së nga PDK-ja.

Debatin e ka mbyllur kryetarja Daka, pas ngritjes së toneve në debat.

“Unë e shpall të mbyllur mbledhjen, e di që është kohë fushate”, tha Daka.

Gjykata Kushtetuese në vendimin e publikuar më 10 dhjetor theksoi se votat që mbërrijnë pas afatit ligjor, të shpallen të pavlefshme e rrjedhimisht nuk mund të numërohen, në rastin që ishte ngritur në këtë gjykatë pas zgjedhjeve të 6 tetorit të vitit të kaluar.