Hashim Thaçi, Kadri Veseli, Rexhep Selimi e Jakup Krasniqi vetëm kanë dëgjuar përplasjet e mbrojtjes e të Prokurorisë që nuk pajtoheshin për afatin e mundshëm për nisjen e gjykimit ndaj tyre.
Megjithëse nga Zyra e Prokurorit të Specializuar kanë thënë së nuk duan të flasin për data, prokurori Alan Tiger ka përmendur synimet e tyre për të nisur këtë gjykim.
“Nuk jemi në gjendje të japim një datë dhe nuk japim një datë për fundin e hetimeve, kjo nuk do të ndikojë në objektivin tonë për një gjykim të drejtë, ne do të ishim të përgatitur që të parashtronim dosjen gjyqësore në fillim të korrikut, pra dy muaj para fillimit të gjyqit”, ka thënë prokurori Alan Tiger.
Por këto afate që i ka përmendur prokurori Tiger, avokati Ben Emmerson, që përfaqëson Kadri Veselin, i ka konsideruar absurde.
“Është një parashtrim shokues, ka vetëm një arsye, që të kufizojë mundësinë e mbrojtjes për përgatitje, në qoftë se rregullat thonë që për një gjykim mbrojtja duhet të ketë pak kohë për përgatitje është në rregull, por nuk e thonë. Afati përcaktohet nga kompleksiteti i rastit”, është shprehur ai.
Sipas mbrojtjes, gjykimi mund të fillojë potencialisht pas 18 muajsh.
“Tek dëgjoj zotin Tiger, më duhej ta pickoja veten për të kuptuar se a isha në ëndërr apo jo, vërtet po thotë se mund të bëhet kështu ky gjyq? Mendoj se është e pakonceptueshme, sigurisht unë e mbaj mendjen e hapur, kur i drejtohem këtij institucioni, por duhet të them se këto fjalë të prokurorisë janë zhgënjyese, ne nuk kemi filluar të krijojmë grupin hetimor, do të duhen të paktën 18 muaj mos më shumë që të fillojmë të hetojmë këtë çështje. Ky është realiteti”, ka thënë David Hooper, avokat i Thaçit.
Një qëndrim të njëjtë mbajtën gjatë seancës edhe avokatët e Rexhep Selimit e Jakup Krasniqit, derisa konferenca e ardhshme statusore ose e përgatitjes së gjykimit është propozuar të mbahet në janar.
Prokuroria ka deklaruar se deri më tani i ka dorëzuar mbrojtjes më shumë se 1300 materiale.
Kundër ish-presidentit të Kosovës, Hashim Thaçi, ish-kreut të PDK-së, Kadri Veseli, deputetit dhe ish-anëtarit të Shtabit të Përgjithshëm të UÇK-së, Rexhep Selimi, dhe ish-zëdhënësit të UÇK-së, Jakup Krasniqi, është konfirmuar aktakuza për krime lufte dhe krime kundër njerëzimit.
© KOHA. Të gjitha të drejtat janë të rezervuara.
