Marsi i vitit 2021 është propozuar si datë kur mund të fillojë gjykimi për ish-eprorin e UÇK-së, Salih Mustafa.
Një propozim i tillë është bërë në seancën e tretë statusore, nga prokurori Cezary Michalzuk.
Ai ka thënë së procesi i nxjerrjes ose i zbulimit të provave është kah fundi.
“Prokurori synon që të përfundojë fazën paragjyqësore të procedurës nga fillimi i vitit të ardhshëm dhe të kalojë në fazën gjyqësore sa më shpejt që është e mundshme dhe pas kësaj ta dorëzojë dosjen e vet paragjyqësore. Duke pasur parasysh këtë që e thashë, duhet të gjithë të kemi si datë të synuar për fillimin e gjykatës diku marsin 2021”, ka deklaruar Cezary Michalzuk.
Mustafa nuk ishte i pranishëm në seancë, por e ndoqi atë përmes video- lidhjes.
Një pjesë e seancës statusore është mbajtur e mbyllur për publikun për shkak te informatave konfidenciale, të cilat janë bërë publike.
Pas kthimit në seancë, avokati i Mustafës, Julion Von Bone, ka kundërshtuar mundësinë që gjykimi të mund të fillojë në marsin e vitit të ardhëm.
Kjo, për shkak që, sipas tij, hetimet ose inspektimet e mbrojtjes do të zgjasin për nëntë muaj.
“Dëgjova se në lajme sot që do të bëhet një mbyllje e plotë në lidhje me pandeminë në Holandë dhe do të fillojë sot dhe do të vazhdojë deri më 19 janar. Siç ju thashë, do të jetë një mbyllje e plotë dhe kjo do t’i kufizojë mundësitë e mbrojtjes për të bërë hetimet e veta apo për të udhëtuar në Kosovë. Do të kisha thënë se hetimet do të zgjasin së paku rreth nëntë muaj”, ka pohuar avokati i Mustafës, Julion Von Bone.
Shqetësuese këtë periudhë, siç e parasheh mbrojtja, e ka konsideruar prokurori Michalzuk.
“Nëse marrim parasysh datën që tha kolegu im, nëntë muaj për hetime, për ne është mjaft shqetësuese, ne e kemi të qartë se mbrojtjes i duhet kohë për hetim, por duhet t’i vlerësojmë edhe masat që janë në lidhje me pandeminë, në çfarë mase do të ndikojnë në mbrojtjen që të udhëtojë drejt Kosovës për të kryer hetimet e tij”, ka thënë Cezar Michalzuk, prokurori i rastit.
Edhe gjyqtari i Procedurës Paraprake, Nicholas Giju, i ka rekomanduar mbrojtjes që t’i vazhdojë hetimet në mënyrë që të mos zgjatet faza paraprake.
Salih Mustafa është i arrestuari i parë nga Specialja. Më 28 shtator, ai nuk kishte pranuar të deklarohej për akuzat që lidhen me krime lufte në Kosovë.
Ndërsa më 28 tetor, ish-eprori i UÇK-së është deklaruar i pafajshëm për katër akuzat e ngritura ndaj tij nga Specialja. Në fund të muajit të kaluar, Gjykata kishte vendosur që Mustafës t’i vazhdohej paraburgimi.
© KOHA. Të gjitha të drejtat janë të rezervuara.
