“Lidhja juaj nuk është private. Sulmuesit mund të jenë duke provuar që të vjedhin informatat tuaja nga trusti10.org si fjalëkalimet, mesazhet apo kredit kartat”. Aplikuesit për 10 përqindëshin e Trustit kanë hasur në këtë porosi të premten, në faqen www.trusti10.org.
Ka pasuar një orë më vonë një njoftim në faqen e Fondit të Kursimeve Pensionale në Facebook se për shkak të cenimit të sigurisë në www.trusti10.org, aplikimi vazhdon në: https://bentenapp.azurewebsites.net/
Zëdhënësi i Trustit Pensional të Kosovës Jeton Demi, ka deklaruar se bëhet fjalë për një tentim për cenim të sigurisë.
“Do ta analizojmë tërë këtë çështje dhe do t’ju njoftojmë me kohë. Ka qenë çështje e certifikatës së sigurisë dhe ai është njoftim automatik dhe nuk kemi njoftim dhe informacion se është cenuar siguria e të dhënave”, ka thënë ai.
Për rrezikun e vjedhjes së të dhënave, ka folur për KOHËN eksperti për siguri kibernetike, Hekuran Doli. Ai tha se Certifikata qeveritare ka dalë prej infrastrukturës së qeverisë dhe ka kaluar në serverët e palës së tretë. Ndaj, sipas tij, edhe të dhënat personale mund të mos jenë të sigurta.
“Të gjitha të dhënat e regjistruara gjatë kohës që nuk ka punuar certifikata nuk i përmbushin dy kushtet kryesore të sigurisë kibernetike që janë konfidencialiteti dhe integriteti, dhe si rezultat në rrafshin e sigurisë së informacionit konsiderohen jovalide. Situatën edhe më të komplikuar e bën ndryshimi i domainit për qasjen në platformë si dhe ndryshimi i certifikatave disa herë brenda një kohe të shkurtër”, ka deklaruar Doli.
Me gjithë problemet rreth sigurisë së të dhënave, zëdhënësi i Trustit ka deklaruar se për rreth 3 orë prej kur ka filluar zyrtarisht aplikimi në orën 15, numri i aplikimeve ka shkuar në 30 mijë.
Në anën tjetër, ka qenë i madh interesimi i qytetarëve për ta ditur gjendjen e tyre dhe për këtë arsye, kanë shkuar direkt te zyrat e Trustit.
Disa prej tyre kanë dalë të zhgënjyer, pasi nuk kanë pasur asnjë cent për ta marrë. E të tjerë kanë folur për shuma të ulëta.
“Meqë nuk po njihet kontributi i para luftës, unë tash nuk mund ta marr asgjë. Kjo nuk është e drejtë. Më duhet të vazhdoj ta marr vetëm pensionin”, ka thënë Raif Ademi nga Podujeva.
“Kisha një shumë simbolike në trust por do t’i marr meqë më takojnë...” është shprehur Osman Bytyqi.
“Kam ardhë të shoh sa para i kam në trust. Me ato mjete do të gjendemi disi...” ka deklaruar Xhavit Fusha.
Më 4 dhjetor pas përpjekjes së tetë, Kuvendi i Kosovës ka miratuar Projektligjin për rimëkëmbjen ekonomike, ku është përfshirë edhe tërheqja e 10-përqind të kursimeve pensionale dhe rimbursimi i vetëm atyre që kanë deri në 10 mijë euro të kursyera.
© KOHA. Të gjitha të drejtat janë të rezervuara.
