Pushimi për festën e 28 nëntorit ka bërë që Sindikata e Bashkuar e Arsimit (SBASHK) të mos i bindet Qeverisë.
Të premten, kryeministri Avdullah Hoti njoftoi se të hënën do të jetë ditë e rregullt pune dhe se nuk do të ketë pushim për nder të Ditës së Flamurit.
Hoti tha se ky vendim vjen për t’u solidarizuar me punëtorët që po përballen me pandeminë, pa asnjë ditë pushim, transmeton KOHA.
“Në të gjitha institucionet shtetërore, në institucionet arsimore në të gjitha nivelet, do të punohet me orar të rregullt, në përputhje me masat antiCovid të ndërmarra nga Qeveria. Ky vendim vjen si solidarizim me të gjithë ata të cilët janë në linjën e parë të frontit me pandeminë Covid- 19, punëtorët shëndetësorë, stafin mbështetës në institucionet shëndetësore, polici dhe inspektorat, të cilët janë duke punuar për disa muaj me radhë pa asnjë ditë pushimi”, ka thënë Hoti.
Por, një ditë më vonë kundër Ekzekutivit ka dalë SBASHK-u. Drejtuesi i kësaj sindikate, Rrahman Jasharaj, ka thënë se pasi që festa ka rastisur të shtunën, në kalendarin e Ministrisë së Arsimit e hëna e 30 nëntorit është ditë pushimi.
“Mësimdhënësit pas një angazhimi tepër të madh, pas gjithë këtyre sfidave me pandeminë besoj që e meritojnë një ditë pushimi të hënën, në mënyrë që të martën të vazhdojnë të punojnë sa më shumë që munden dhe dinë për të përfunduar gjysmë vjetorin e parë të këtij viti shkollor”, ka thënë Jasharaj.
Pavarësisht reagimit të Sindikatës, Qeveria ka ritheksuar se e hëna do të jetë ditë normale pune.
“Ashtu siç ju kemi njoftuar dje, dita e hënë është ditë e rregullt e punës në të gjitha institucionet shtetërore, në institucionet arsimore në të gjitha nivelet, do të punohet me orar të rregullt, në përputhje me masat antiCovid të ndërmarra nga Qeveria”, ka thënë Antigona Baxhaku, nga Zyra e Qeverisë për komunikim me publikun.
Në kalendarin e festave zyrtare, 28 Nëntori në Kosovë vazhdon të jetë ditë pune. Shteti këtë festë e ka përfshirë te Ditët Memoriale, nën emërtimin "Dita e Shqiptarëve”.
© KOHA. Të gjitha të drejtat janë të rezervuara.
