Deri në shtyrje fizike ka përshkallëzuar debati për personat e pagjetur ndërmjet deputetëve të Kuvendit të Kosovës.
Në pamje shihen shefi i deputetëve të LDK-së, Arben Gashi, dhe deputetja e Lëvizjes Vetëvendosjes, Mimoza Kusari – Lila, teksa përplasen verbalisht, ndërsa më pas grumbullohen edhe deputetë të tjerë, duke përfshirë edhe ata të LVV-së.
Shtyrjet ndërmjet deputetëve erdhën derisa deputetja e LVV-së, Saranda Bogujevci, po fliste në interpelancë dhe kur u dëgjua dikush nga deputetët duke thënë se “duhet t’i vijë marre”.
Pas situatës së krijuar, nënkryetarja e Kuvendit, Arbërie Nagavci, e dërgoi seancën në pauzë.
Këtyre tensioneve u paraprinë edhe disa përplasje verbale. Në interpelancën që u ftua për përfshirjen e çështjes së të pagjeturve në marrëveshjen e Washingtonit, Arbërie Nagavci nga ulësja e kryetares së Kuvendit akuzoi kryeministrin Hoti për trajtim të padrejtë të kësaj teme.
Por me këto akuza nuk u pajtua Hoti, i cili tha se nuk ka pasur asnjë lloj kushtëzimi ndërmjet të pagjeturve dhe personave të zhvendosur.
PDK-ja ka kritikuar Hotin për mungesën e tij në pjesën më të madhe të diskutimit, derisa LDK-ja ka kërkuar që çështja e të pagjeturve të mos politizohet.
Interpelanca përfundoi pa miratimin e rezolutës për të pagjeturit, për shkak të mungesës së kuorumit.
© KOHA. Të gjitha të drejtat janë të rezervuara.
