Një mori bastisjesh janë kryer nga policia austriake e që kanë rezultuar me 14 të arrestuar, prejse një sulmues i armatosur la katër persona të vdekur në zemër të Vjenës.
Derisa pretendohet se ka pasur më shumë se një person të armatosur, për të konfirmuar këtë policia e këtij shteti është duke vlerësuar gati 20 mijë xhirime nga telefona mobilë, raporton KOHA.
Megjithatë, autoritetet besojnë se sulmuesi i vrarë kishte vepruar i vetëm.
Ministri i Brendshëm i Austrisë, Karl Nehammer, ka thënë se atentatori 20-vjeçar, i vrarë nga policia në Vjenë, ka rrënjë “nga Maqedonia Veriore” dhe ka qenë i dënuar për shkak të bashkimit për motive terroriste.
Agjencia austriake e lajmeve, APA, ka bërë të ditur se terroristi quhej Kujtim Fejzulai dhe kishte shtetësi austriake dhe atë maqedonase.
Sulmuesi, sipas autoriteteve, ishte pa dyshim ithtar i “Shtetit Islamik”, dhe se në prill të vitit të kaluar ishte dënuar me 22 muaj burg, pasi ishte kapur në përpjekje për të shkuar në Siri, për t’iu bashkuar organizatës terroriste.
Viktimë e Fejzulait është bërë edhe një bashkëkombës i tij.
Në mesin e katër të vrarëve është edhe emri i shqiptarit Nexhip Vrenezi nga Veleshta e Strugës, dhe kjo është bërë e ditur nga ish-politikani Bardhyl Mahmuti, përmes një postimi në Facebook.
Një tjetër element shqiptar i tragjedisë në Vjenë, kanë qenë edhe disa pjesëtarë të policisë austriake.
Ministrja e Punëve të Jashtme e Kosovës, Meliza Haradinaj, ka bërë të ditur se tre nga policët të cilët janë ballafaquar mbrëmë me sulmuesit në Vjenë janë shqiptarë nga Kosova.
Ajo këtë e ka bërë të ditur në një konferencë të përbashkët me ministrin federal të Punëve të Jashtme të Gjermanisë, Heiko Maas, ku edhe po qëndron për vizitë.
Sulmin e kanë dënuar liderët politikë të Kosovës, e me popullin austriak janë solidarizuar edhe liderët e vendeve evropiane.
Gjermania ka vlerësuar se duhet të ketë më shumë bashkëpunim ndërmjet shërbimeve inteligjente në luftën kundër terrorizmit.
Derisa lideri francez, Emmanuel Macron, ka thënë se pavarësisht sulmeve të shpeshtuara nga terroristët islamikë, Evropa nuk do të dorëzohet për mbrojtjen e vlerave themelore të saj.
© KOHA. Të gjitha të drejtat janë të rezervuara.
