Pas më shumë se 7 muajsh prej kur u mbyll Qendra e Studentëve si pasojë e pandemisë, brenda pak ditësh ajo pritet të hapet sërish.
Megjithëse nuk mbeti pa u shfrytëzuar, pasi ndërmjet muajve mars e maj shërbeu si karantinë për personat që vinin nga jashtë shtetit, tani Qendra, sërish do të shërbejë për qëllimin e saj parësor, transmeton KOHA.
Kjo pasi që është hapur konkursi për pranimin e 1.600 studentëve në konvikte dhe mensë.
Instituti Kombëtar i Shëndetit Publik ka rekomanduar që hapja e konvikteve dhe mensës të bëhet duke respektuar disa masa, si mbajtja e maskave, respektimi i distancës, vendosja e dezinfektuesve nëpër korridore e ruajtja e higjienës.
Me hapjen e Qendrës së Studentëve pritet edhe hapja e bibliotekave të konvikteve, ku gjithashtu është rekomanduar respektimi i distancës fizike.
E në mensë tashmë janë duke u bërë përgatitjet e fundit për pranimin e studentëve. Disa nga rekomandimet janë pastrimi dhe dezinfektimi i hapësirave pas çdo racioni dhe vendosja e dezinfektuesve në çdo tavolinë.
Drejtori i Mensës, Fahri Osmani, ka thënë se për t’u pranuar në konvikte e mensë, përparësi do të kenë studentët që kanë punë laboratorike dhe janë të detyruar të jenë prezentë në ligjërata.
“Ne i kemi marrë udhëzimet nga ana e Institutit Kombëtar, do të respektohet distanca, do të respektohet rekomandimi në një dhomë vetëm një student, do të respektohet edhe higjiena, do t’i marrim masat e nevojshme në mënyrë që të ruhet distanca qoftë në mensë, qoftë në konvikte”, thotë Osmani.
KOHA ka tentuar të marrë një qëndrim nga Ministria e Shëndetësisë dhe bordi këshillëdhënës anti-COVID nëse hapja e Qendrës së Studentëve mund të ndikojë në shtimin e rasteve, por nuk ka marrë përgjigje.
Konkursi për pranimin e studentëve në konvikte e mensë do të jetë i hapur deri më 7 nëntor, kurse aplikimi do të mund të bëhet vetëm online.
© KOHA. Të gjitha të drejtat janë të rezervuara.
