Në javën kur pritej që të arrihej një marrëveshje mes Telekomit dhe Z-Mobile për shlyerjen e borxhit brenda 2 vjetëve, kjo e fundit ia ka bllokuar llogaritë bankare.
Bllokimi ka ndodhur pasi Gjykata e Apelit ka vërtetuar vendimin e Themelores për njohjen e vendimit të Arbitrazhit.
Veprimi i Z-Mobile, sipas Telekomit, ka qenë veprim i papritur para arritjes së marrëveshjes dhe se ka rrezikuar funksionimin e ndërmarrjes.
“Edhe pas zotimeve të vetë kryeministrit dhe dakordancës që marrëveshja do të nënshkruhet këtë javë, zyrtarët e Dardafon me një e-mail kanë kërkuar nga përmbaruesi i tyre që t’i bllokojë llogaritë e Telekomit të Kosovës, pra kjo që ka ndodhur sot ka qenë një thyerje e marrëveshjes së arritur tashmë dhe kështu kanë rrezikuar skajshmërisht funksionimin e ndërmarrjes. Kërkojmë që menjëherë të zhbllokohen llogaritë tona dhe kështu t’i hapin rrugë marrëveshjes”, ka thënë Menduh Abazi, drejtor i Departamentit për Relacion Publik.
Sipas Telekomit, kryeministri Avdullah Hoti dhe ministri i Ekonomisë dhe Ambientit, Blerim Kuçi, ua kanë kumtuar përfaqësuesve të Dardafon se Qeveria do ta ndërmjetësojë këtë marrëveshje dhe do të jetë garantuese që borxhi të paguhet brenda dy vjetëve.
KOHA ka provuar që të marrë një qëndrim edhe nga Ministria e Ekonomisë dhe e Ambientit lidhur me këtë çështje, por ata nuk janë përgjigjur.
Ndërkohë, Federata Sindikale e Punëtorëve të Telekomit ka kërkuar shkarkim të Bordit të Telekomit.
“Gjithçka që ka bërë Z-Mobile është bërë me planifikim dhe tentimi i tij është që të arrijë një marrëveshje më të favorshme dhe atë që ata dëshirojnë është kthimi i tyre në Telekom pa investuar asnjë cent, por ky kapitull është kapitull i mbyllur dhe se Z-Mobile nuk do të kthehet në Telekomin e Kosovës”, ka thënë kryetari i FSP-PTK-së, Lamih Balaj.
Gjatë diskutimeve të fundit në mes të Telekomit dhe Dardafonit, me ndërmjetësim të Qeverisë, Telekomi kishte propozuar riprogramim të borxhit për 5 vjet, ndërsa pas diskutimeve dhe ndërmjetësimit të Qeverisë ishte vendosur në parim që borxhi të paguhet për dy vjet.
© KOHA. Të gjitha të drejtat janë të rezervuara.
