Zgjedhja e presidentit është mohuar të ketë qenë temë e diskutimit në takimin e krerëve të partive në koalicionin qeverisës këtë të premte.
Kryetari i LDK-së, Isa Mustafa, Ramush Haradinaj i AAK-së dhe Fatmir Limaj nga Nisma, për rreth një orë kanë diskutuar në ambientet e Kuvendit.
Pas takimit, kryetari i LDK-së ka thënë se është ende herët të hapet çështja e presidentit, për shkak se i njëjti ka ende mandat, raporton KOHA.
Përgjigje lidhur me çështjen e presidentit nuk ka dhënë as kreu i AAK-së, Ramush Haradinaj.
Që të dy liderët e partive në qeveri janë shprehur të gatshëm të diskutojnë për postin e presidentit në rast se Hashim Thaçi jep dorëheqje shkaku i zhvillimeve rreth Gjykatës Speciale.
Në anën tjetër, Mustafa e Haradinaj kanë thënë se qëllimi i takimit mes tyre kanë qenë buxheti dhe rimëkëmbja ekonomike
Partitë në pushtet, në marrëveshjen e arritur për bashkëqeverisje, nuk kanë përfshirë edhe pozitën e presidentit, me arsyetimin se mandati i presidentit aktual nuk përfundon deri më 2021.
© KOHA. Të gjitha të drejtat janë të rezervuara.
