“Nuk keni parë gjë akoma, sa u përket vendimeve të kthimit të ligjshmërisë”.
Kështu e ka përmbyllur sqarimin e tij kryeministri Avdullah Hoti lidhur me vendimet e marra ditë më parë për shuarjen e Task-Forcës Kundër Korrupsionit dhe shkarkimin e udhëheqësve të ATK-së, Doganës e Policisë.
Hoti ka thënë se një ndër arsyet e shkarkimit të drejtorit të Policisë, Rashit Qalaj është mungesa e performancës, kurse për atë të ATK-së, Ilir Murtezaj, paaftësia e sjellja e keqe, raporton KOHA.
Ndërsa, sipas kryeministrit Hoti, vendimi për formimin e Task-Forcës Kundër Korrupsionit ka qenë në kundërshtim me Kushtetutën.
“Përmes këtij vendimi brenda policisë së Kosovës janë kriju struktura joligjore jo në përputhje me ligjin për Policinë jo institucionale”, ka thënë Hoti.
Në konferencën e thirrur për shpalosjen e punës së tij katërmujore si kryeministër, Hoti ka folur edhe për dialogun e asociacionin.
Megjithëkëtë, as këtë të mërkurë ai nuk ka sqaruar qëndrimin e tij lidhur me mundësinë e ndryshimit të Kushtetutës për zbatimin e marrëveshjes së asociacionit.
I pari i Qeverisë thotë se tema e asociacionit nuk do të ndikojë në procesin e bisedimeve me Serbinë.
“Nuk pres që të bllokohet dialogu për shkak të saj, e nëse bllokohet jo për shkak tonin sepse kemi tregu mjaftë përkushtim për këtë proces duke marrë veprime shumë të vështira dhe jo populliste në fillim të mandatit tonë”, ka shtuar Hoti.
Kreu i ekzekutivit është shprehur i bindur që do ta përfundojë mandatin deri në fund. Derisa ka thënë se kurdo që e dorëzon detyrën, do ta bëjë në “situatë shumë më të mirë” sesa që e ka pranuar.
© KOHA. Të gjitha të drejtat janë të rezervuara.
