Kutive të votimit do t’iu drejtohen qytetarët e Podujevës dhe të Mitrovicës së Veriut më 29 nëntor. Vendimin për ditën e zgjedhjes së kryetarëve të dy komunave e ka bërë të ditur presidenti Hashim Thaçi.
Në njoftimin e zyrës së tij thuhet se “organizimi dhe mbajtja e zgjedhjeve për kryetar të Komunës së Podujevës dhe për kryetar të Komunës së Mitrovicës së Veriut duhet të bëhet në koordinim dhe bashkërendim me institucionet përkatëse, në pajtim me Ligjin nr. 07/L-006 për Parandalimin dhe Luftimin e Pandemisë COVID-19 në territorin e Republikës së Kosovës”.
Derisa për zgjedhjet në Podujevë, të planifikuara për muajin mars, mjetet janë alokuar më herët, për organizimin e atyre në Mitrovicën e Veriut KQZ-ja ka nevojë për buxhet shtesë.
“Sa i përket zgjedhjeve të jashtëzakonshme për kryetar të Mitrovicës së Veriut, KQZ do të dërgojë gjatë këtyre ditëve një kërkesë buxhetore në Ministrinë e Financave pra ku do të kërkojë buxhet për të organizuar këto zgjedhje sepse janë zgjedhjet cilat nuk janë të planifikuar këtë vit dhe rrjedhimisht duhet një kërkesë e re buxhetore në mënyrë që të mund të mbahen këto zgjedhje”, ka thënë Valmir Elezi, zëdhënës në KQZ.
Por data e zgjedhjeve në Podujevë nuk është duke i pëlqyer kandidatit të Vetëvendosjes për kryetar të Podujevës, Shpejtim Bulliqi.
“Nuk ka pasur nevojë që të krijohet ky vakum duke marrë parasysh situatën pandemike që e kem në vend dhe po të kishim pas vullnetin që sa ma shpejt të kryejmë këtë proces të zgjedhjeve. Unë mendoj që afatet është dashtë me i shkurtuar sepse ne procesin e fushatës e kemi kryer në muajin mars atëherë”, është shprehur Bulliqi.
Kandidati i LDK-së për të parin e Podujevës frikësohet se gjendja me pandeminë do t’i shtyjë sërish zgjedhjet në këtë komunë.
“Shpresojmë që zgjedhjet të mbahen në kohën e caktuar. Shpresoj që situata me pandeminë të mos përkeqësohet që të ketë prapë nevojë që të shtyhen. Shpresoj që do të mbahen me 29 nëntor”, ka deklaruar Rudari.
Lidhur me shpalljen e zgjedhjeve KOHA ka provuar që të marrë një qëndrim edhe nga kandidati i PDK-së, Naim Fetahu, por ai nuk ka qenë i gatshëm për një gjë të tillë, të martën.
Komuna e Podujevës dhe ajo e Mitrovicës së Veriut kanë mbetur pa kryetar që nga koha kur Agim Veliu u emërua ministër i Punëve të Brendshme e Goran Rakiqi, zv.kryeministër në Qeverinë Hoti.
© KOHA. Të gjitha të drejtat janë të rezervuara.
