Video

Nga e shtuna në Prishtinë u regjistruan 54 raste pozitive me COVID-19

Një ditë pasi shifrat me Covid-19 në Kosovë kanë arritur në afër 150, kryeministri Avdullah Hoti ka kërkuar nga qytetarët kujdes maksimal për të përballuar valën e dytë të virusit dhe evituar mbylljen totale.

Përmes një statusi në Facebook ai ka shkruar se shifrat e të prekurve nga e shtuna janë bërë treshifrore, kurse numri i të prekurve brenda 24 orëve është dyfish më i lartë se i të shëruarve.

Sipas tij, SHSKUK ka planin për aktivizim të shtretërve shtesë në Prishtinë dhe në spitale regjionale, si dhe është bërë plani për rishpërndarjen e stafit mjekësor sipas nevojës. Po ashtu ka theksuar se janë rritur kapacitetet testuese dhe se së shpejti testimi do të decentralizohet nëpër regjione.

“IKSHPK ka ngritur struktura rajonale të inteligjencës për të identifikuar vatrat infektive. Në shkolla ka kontroll të shtuar. Po rishikohen lista e vendeve me rrezik për të ndaluar udhëtimin nga ato vende, gjithmonë duke u bazuar në protokollet përkatëse. Janë aktivizuar inspektoratet përkatëse për të mbikëqyrë zbatimin e masave. Në baza të rregullta javore po koordinohemi me partnerët ndërkombëtarë që janë duke na mbështetur në përballimin e situatës”, ka shkruar ai.

E sipas raportit të Institutit Kombëtar të Shëndetit Publik, në 24 orët e fundit një person i prekur me Covid e ka humbur jetën derisa 49 persona janë shëruar. Sipas këtij raporti, nga 869 mostra, kanë rezultuar 137 raste të reja.

Numri total i rasteve pozitive është 16.891, ndërkaq numri i rasteve aktive mbetet 1.572.

Një ditë më parë, ministri i Shëndetësisë, Armend Zemaj, ka kërkuar që të gjitha institucionet qendrore e lokale t’i ndalin urgjentisht seminaret, punëtoritë dhe format e tjera të organizimit ku ka grumbullim njerëzish. Ai ka rekomanduar që të përdoren format online të takimeve, të punës dhe aktivitetet e tjera.

Sipas Zemajt, Policia e Kosovës dhe të gjitha inspektoratet bashkë me komunat dhe shtabet emergjente duhet të veprojnë urgjentisht në parandalimin e përkeqësimit të situatës.