30 ditë arrest shtëpiak i janë caktuar gjinekologut nga Prishtina A.G., i cili u arrestua një ditë më parë me dyshimet se kishte kryer veprën penale “ndërprerja e palejuar e shtatzënësisë” dhe për moslajmërim të rastit.
Sipas kërkesës së paraburgimit, A.G. më 15 shkurt të këtij viti, gjatë kontrollit mjekësor të së miturës 13-vjeçare, ndonëse e kishte zbuluar që e mitura ishte e dhunuar, ai nuk e kishte lajmëruar veprën penale të dhunimit, derisa e kishte kryer abortin e saj në javën e shtatë të shtatzënësisë, raporton KOHA.
Më tutje, në kërkesën e prokurorisë, thuhet se i dyshuari në kundërshtim me Ligjin për ndërprerjen e shtatzënësisë dhe pa pëlqimin e së dëmtuarës e as të prindërve të saj e kishte ndërprerë shtatzënësinë duke e dëmtuar rëndë shëndetin e saj.
“Më dt. 15.2.2020, në ordinancën e tij private, i pandehuri, në cilësinë e mjekut gjinekolog dhe si person përgjegjës i ordinancës private gjinekologjikë, “me rastin e kontrollimit mjekësor - gjinekologjik të së dëmtuarës së mitur nën moshën 14 vjeçare, nuk e ka lajmëruar veprën penale të dhunimit, të cilën e ka zbuluar gjatë ushtrimit të detyrës së tij, në mënyrë që me rastin e kontrollimit mjekësor-gjinekologjik ka konstatuar shtatzënësinë dhe ka kryer abortin e të dëmtuarës së mitur nën moshën 14-vjeçare, e cila ka qenë shtatzënë prej 7 (shtatë) javësh, ashtu që nuk e ka lajmëruar veprën penale të dhunimit, të cilën e ka zbuluar gjatë ushtrimit të detyrës së tij”, thuhet në njoftim të Prokurorisë Themelore në Gjilan.
Prokuroria e Gjilanit gjithashtu është duke hetuar edhe një gjinekolog tjetër në Gjilan me inicialet T.D., i cili dyshohet se nuk e kishte lajmëruar veprën penale të dhunimit, kur viktima fillimisht kishte kryer një kontroll gjinekologjik.
KTV-ja ka kontaktuar me mjekun nga Gjilani, i cili ka pranuar se ia kishte kryer një kontroll mjekësor të miturës, por që nuk ishte në dijeni se kishte të bënte me dhunim dhe se ai nuk e kishte ditur se këtë rast do të duhej ta paraqiste në polici.
Avokati i gjinekologut nga Prishtina, Shemsedin Piraj, i ka thënë KOHËS përmes telefonit se, meqenëse rasti ka të bëjë me një të mitur, ai për momentin nuk mund të deklarohet.
Për dhunimin e së miturës tashmë në paraburgim gjenden edhe dy persona, SH.J. dhe SH.H., të cilët dyshohet se e kishin dhunuar të miturën, derisa Sh. J. dyshohet se kishte dërguar të miturën për të kryer abortin për të cilin kishte paguar shumën prej 500 eurove.
“Në deklaratën e tij i pandehuri Sh.J. ka pranuar se tani me të dëmtuarën ka pasur marrëdhënie seksuale dhe ajo kishte mbetur shtatzëne, e të cilën e kishte dërguar tek mjeku fillimisht në Gjilan e më pas edhe në një ordinancë private në Prishtinë, ku edhe e ka kryer abortin. Për kryerjen e abortit kishte paguar shumën prej 500 eurosh”, ka njoftuar Prokuroria Themelore.
© KOHA. Të gjitha të drejtat janë të rezervuara.
