Ambasada e Kosovës në Washington më nuk do të udhëhiqet nga Vlora Çitaku.
Nëpërmjet një dekreti, presidenti Hashim Thaçi ka urdhëruar tërheqjen e saj nga pozita e ambasadores në Shtetet e Bashkuara.
Por, kthimi nuk do të jetë i menjëhershëm.
“Me qëllim të sigurimit të mbarëvajtjes së punës në misionin diplomatik në Shtetet e Bashkuara të Amerikës, Ambasadorja znj. Çitaku do të qëndrojë në detyrë deri në emërimin e shefit të ri të misionit diplomatik dhe dorëzim-pranimit të detyrës”, shkruhet në dekretin e presidentit Thaçi.
Presidenti Thaçi e ka nxjerrë dekretin vetëm pas një kërkese që dy javë më parë ambasadorja Çitaku ia ka shtruar atij, për ta tërhequr nga detyra.
Kësisoj, kreu i shtetit nuk e ka bazuar fare dekretin në kërkesën që shtatë muaj më parë ia kishte paraqitur atij Glauk Konjufca, sa ishte ministër i Jashtëm.
Konjufca kishte kërkuar që të tërhiqeshin gjashtë ambasadorë e një konsull, pasi konsideronte se ata po qëndronin në misione jashtëligjshëm ngaqë ishin të emëruar politikë, dhe si të tillë mund ta ushtronin vetëm një mandat 4-vjeçar e jo më shumë.
Pas publikimit të dekretit të presidentit Thaçi, edhe ambasadorja Çitaku ka konfirmuar largimin.
“Është zyrtare. Pas më shumë se pesë vjetëve në Ëashington DC, ka ardhur koha që unë të kthehem në shtëpi. Përfaqësimi i Kosovës në Shtetet e Bashkuara ka qenë nder i jetës sime”, ka shkruar Çitaku.
Përpara se të emërohej ambasadore, Çitaku ka qenë një prej bashkëpunëtorëve më të ngushtë të presidentit Thaçi, gjatë kohës sa ky e ka drejtuar PDK-në.
Çitaku ka qenë deputete e edhe ministre e Integrimit Evropian. Së fundmi, emri i saj është përfolur si kandidate e PDK-së për presidente.
© KOHA. Të gjitha të drejtat janë të rezervuara.
