Në ditën kur djali i saj, Albioni, do t’i mbushte 41 vjet, Nysrete Kumnova po vazhdon të kërkojë zbardhjen e rastit të tij, por edhe të gjithë personave të tjerë të pagjetur që nga lufta e fundit në Kosovë.
Sipas saj, institucionet e Kosovës përveç premtimeve boshe nuk kanë punuar sa duhet, duke lëshuar pe në dialogun me Serbinë, raporton KOHA.
Ajo madje ka thënë se ata janë ndier të ofenduar edhe me deklaratat e ministrit të Jashtëm të Serbisë, Ivica Daçiq, lidhur me varrezat masive të shqiptarëve në Serbi.
“Kam ardhur që të kërkoj drejtësi. Deklarata publike e Daçiqit, duke i kërcënuar serbët të cilët po i tregojnë krimet serbe kundër shqiptarëve dhe vendet ku ndodhën varrezat masive, në fakt ku janë varrosur shqiptarët nga ushtria serbe, duhet të jetë edhe leksioni i fundit për pushtetarët tanë dhe të gjitha instancave ndërkombëtare”, ka thënë ajo.
Ajo thotë se është prekur shumë edhe nga deklarata e zv.kryeministrit, Driton Selmanaj.
“E dhimbshme. Është papërgjegjësi dhe turp sjellja e një udhëheqësi të lartë. Prandaj, kërkoj nga shtetarët e Kosovës të mos bëjnë politika të gabuara kur janë në pyetje më të dashurit tanë. Për Driton Selmanajn kjo temë është e konsumuar, për mua jo sepse unë kam të drejtë të kërkoj birin tim, Albionin, dhe të gjithë bijtë e bijat e Kosovës të cilat ende rezultojnë të pagjetur”, ka shtuar Selmanaj.
Ka kërkuar që pjesë e delegacionit në bisedime të jetë njëra nga nënat që me dëshmi e fakte do t’ia dokumentojnë Serbisë krimet e bëra.
Ndërsa organizata joqeveritare “Ngritja e Zërit” ka dorëzuar për herë të tetë dosjet e radhës në Gjykatën Kushtetuese rreth vlerësimit të kushtetutshmërisë së aktit juridik të Gjykatës Supreme, me rastin e refuzimit të padisë për kompensimin e dëmeve të luftës.
Jahir Bejta, drejtor i kësaj organizate, tha se gjykatat nuk po shqyrtojnë paditë për kompensim të dëmeve të luftës me arsyetimin që nuk janë kompetente e që, sipas tij, kjo nuk qëndron.
© KOHA. Të gjitha të drejtat janë të rezervuara.
