Fatime Isufi, e cila punon si shpërndarëse e ushqimit në Klinikën e Gjinekologjisë, në kohën kur fluksi i pacientëve të infektuar me COVID–19 ishte më i lartë, kishte shërbyer më shumë se 100 pacientë në ditë.
Madje, ajo gjatë punës ishte infektuar edhe vetë me koronavirus, pasojat e së cilës sëmundje po i bart edhe sot.
Përkundër kësaj, ajo nuk është përfshirë në listën e shtesave që Qeveria ka paraparë për mjekët e infermierët që kanë kontakt direkt me të prekurit me COVID–19.
“Unë kam punuar edhe në Infektivë, direkt me pacientë me COVID-19, jam sëmurë këtu me COVID, dhe nuk kam marrë shtesë, megjithëse s'më ka interesuar edhe aq paraja sa më ka interesuar shëndeti im, që nuk po mundem me marr veten ende, edhe pse i ka tre muaj gati prej kur jam infektuar. Atëkohë kur jam dalë kemi qenë 2 punëtore në infektivë, 130 pacientë i kemi shërbyer dhe në fund mos me ta paguar shujtën është marre për ta”, shprehet Isufi.
Po ashtu, shtesë nuk ka marrë as Fikrije Dumani, e cila punon në Kardiologji, përkundër se vuan nga kanceri. Ajo thotë se ishte liruar nga drejtoria, por që ka vendosur që t’i shërbejë pacientët e prekur me COVID-19.
“Të gjitha edhe të sëmura kemi punuar me pacientë me COVID-19. Ne kemi çuar ushqim së pari, e pastaj janë marrë me ta stafi i doktorëve, e i motrave. E sëmurë jam me kancer, por nuk iu kam nda punës kurrë, sepse s'kam deshtë vetë, e me na nda kështu është tmerr”, ka thënë Dumani.
Bashkë me Fatmiren e Fikrijen, në shenjë pakënaqësie për mospërfshirje në listat e shtesave kanë protestuar të mërkurën edhe me dhjetëra punëtorë të personelit mbështetës, të cilët janë të punësuar në QKUK dhe SHSKUK.
Në protestë morën pjesë punëtorë nga administrata, recepsionistët, vozitësit e autoambulancave, sigurimi, shërbyesit e ushqimit, bocmenët, shërbimet teknike, si dhe ata të pastrimit. Por, të panevojshme e quajti këtë protestë ushtruesi i detyrës së drejtorit të SHSKUK-së, Valbon Krasniqi, i cili theksoi se tashmë janë shqyrtuar të gjitha mundësitë, që edhe punëtorët e stafit mbështetës të përfshihen në pakon emergjente.
“Menaxhimi i pandemisë është bërë falë bashkëpunimit të mirë të të gjithë sektorëve të njësive të SHSKUK-së edhe të punëtorëve shëndetësorë, por edhe të stafit mbështetës. Si menaxhment kemi bërë të gjitha përgatitjet e nevojshme që të gjithë punëtorët të përfshihen në këtë skemë të përfitimit. Jemi në bashkëbisedim me Qeverinë dhe Ministrinë e Shëndetësisë që do të shqyrtohen të gjitha mundësitë që të gjithë punonjësit e SHSKUK-së të përfshihen në këtë pagesë shtesë prej 300 eurosh’’, ka thënë Krasniqi.
Në rast se kërkesa e tyre për përfshirje në këto lista nuk plotësohet, punëtorët teknikë kanë paralajmëruar se që nga e hëna do ta bojkotojnë edhe punën.
KOHA në vazhdimësi ka raportuar për ndarjen zinxhirore që i është bërë personelit të qendrave mjekësore, që janë në kontakt të vazhdueshëm me personat e prekur me COVID-19.
© KOHA. Të gjitha të drejtat janë të rezervuara.
