Ka një muaj që ka marrë mandatin, e shefi i ri i Zyrës së BE-së në Kosovë, Tomas Szunyog, gjatë së martës qëndroi në Mitrovicën e Jugut dhe të Veriut. Ai takoi udhëheqësit e këtyre dy komunave, derisa foli rreth Asociacionit të komunave me shumicë serbe.
Në një konferencë për media, tha se Asociacioni i komunave serbe është temë e hapur, për të cilën duhet të flitet në Bruksel në kuadër të marrëveshjes, raporton KOHA.
“Sa i përket Asociacionit është temë për diskutim në dialog dhe në fund të ditës secili duhet të pajtohet që BE-ja po e lehtëson dialogun. Shpresoj që në fund do të arrihet një marrëveshje gjithëpërfshirëse dhe ligjërisht e obligueshme, e cila duhet t’u japë zgjidhje të gjitha çështjeve të hapura ndërmjet Prishtinës dhe Beogradit”, ka thënë Szunyog.
Serbia ka kërkuar që në takimin e radhës në Bruksel, të futet në rend dite tema e Asociacionit, gjë që u kundërshtua nga pala kosovare. Kryeministri, Avdullah Hoti, e ka cilësuar temë të mbyllur këtë çështje, derisa udhëheqësit në Serbi kanë thënë se duhet të zbatohen të gjitha marrëveshjet e nënshkruara gjatë vitit 2013 e 2015, por jo me ligje të Kosovës.
Çeku komentoi edhe rreth urës së Ibrit për të cilën tha se nuk e di se kur do të hapet, por e cila është rinovuar tash e sa vjet nga paratë e BE-së. Megjithatë, shtoi që përparim tashmë është bërë në këtë aspekt.
“Kjo është njëra prej të arriturave të BE-së, mua më kanë treguar fotografi se si ka qenë më parë dhe kjo është zhvillim pozitiv dhe do ta diskutojmë këtë me ushtruesin e detyrës së kryetarit në Veri, dhe ata të Jugut. Kjo është diçka që duhet të dakordohen të dyja palët”, shtoi Szunyog.
Derisa ambasadori i BE-së, duke folur për investimet që kanë bërë ndër vite në veri të Mitrovicës, ka theksuar se Bashkimi Evropian i kushton vëmendje të posaçme zhvillimit të kësaj pjese.
Ambasadori i BE-së në Kosovës, nga Ura e Ibrit e deri tek objekti i Komunës së Mitrovicës së Veriut, vazhdoi në këmbë, për t’u takuar me përfaqësues të palës serbe. I pranishëm këtu ishte edhe zv.kryeministri i Kosovës, Goran Rakiq.
Në këtë pjesë Szunyog vizitoi objektin, i cili edhe është investim i Bashkimit Evropian, e që filloi të shfrytëzohej vitin e shkuar.
© KOHA. Të gjitha të drejtat janë të rezervuara.
