Pak minuta pas mesnatës, ekskavatori do të përmbyllë aksionin disaorësh të Policisë së Kosovës kundër veprimit të jashtëligjshëm të kazinove në zonën kufitare me Serbinë.
Aksioni në Karaçevë të Kamenicës nisi pasditen e së premtes me bastisjen e lokaleve të lojërave të fatit, për të vazhduar me konfiskimin e aparateve e përfunduar me rrënimin e objekteve deri në orët e para të mëngjesit të së shtunës.
Përveç Policisë e Inspektoratit në vendngjarje u panë edhe zyrtarë të Administratës Tatimore e kryetari i Kamenicës, Qëndron Kastrati, raporton KOHA.
Një ditë më pas në një konferencë për media, detajet e aksionit i bëri të ditura Prokuroria Themelore në Gjilan.
Sipas kryeprokurorit Jetish Maloku të arrestuar janë 35 persona prej tyre 12 zyrtarë policorë.
Sipas Policisë së Kosovës operacioni ka qenë i shtrirë edhe në Prishtinë, derisa nga të gjitha lokacionet janë konfiskuar numër i konsiderueshëm i materialeve.
Ndonëse u tha se hetimet për operacionin kanë nisur qysh para një viti, nisja e tij është bërë e ditur pak orë pas përplasjes se ministrit të Punëve të Brendshme, Agim Veliu me deputetët e Vetëvendosjes pikërisht për veprimtarinë e kazinove në Karaçevë.
Por, sipas kryeprokurorit Maloku, aksioni i mbrëmshëm nuk është i ndërlidhur me deklaratat e ministrit Veliu.
Në mars të 2019-s deputetët e Kuvendit të Kosovës miratuan ligjin përmes të cilit ndalohet veprimtaria e lojërave të fatit për 10 vjet. Vendim ky i marrë pak javë pas disa incidenteve në kazino, ku pati edhe persona të vrarë.
© KOHA. Të gjitha të drejtat janë të rezervuara.
