Janë bërë 100 ditë qëkur Lidhja Demokratike e Kosovës mori udhëheqjen e Qeverisë.
Por për punën e Avdullah Hotit gjatë kësaj periudhe në krye të Ekzekutivit, partitë opozitare kanë vetëm kritika, raporton KOHA.
Lëvizja Vetëvendosje ka akuzuar Qeverinë për menaxhim të dobët të pandemisë dhe dorëzim para Serbisë në procesin e dialogut.
Këtë 100 ditësh e ka quajtur të dështuar Partia Demokratike, e cila thotë se Qeveria Hoti përpos që nuk ndihmoi qytetarët e dëmtuar nga pandemia, ajo e bëri Serbinë bashkëpronare të Liqenit të Ujmanit në Washington.
Përmes një komunikate për media, PDK-ja e ka vlerësuar Qeverinë si të dobët, aspak transparente dhe pa mbështetje legjitime qytetare për të qeverisur me vendin.
Përballë kritikave, Ekzekutivi thotë se ka qenë maksimalisht i përkushtuar për përmirësimin e situatës me COVID-19.
Për këta tre muaj, sipas zëdhënësit të Qeverisë, Xhavit Beqiri, është arritur të përmirësohen marrëdhëniet me partnerët ndërkombëtarë.
Hoti u zgjodh kryeministër më 3 qershor, rreth dy muaj pas rrëzimit të Qeverisë që udhëhiqej nga Albin Kurti.
Ai pati premtuar se prioritet i Qeverisë së tij do të jetë menaxhimi i pandemisë.
© KOHA. Të gjitha të drejtat janë të rezervuara.
