8 persona kanë vdekur gjatë 24 orëve të fundit në Kosovë, duke e çuar në 373 numrin e të vdekurve nga COVID-19.
Në 491 mostrat e IKSHPK-së, 193 persona kanë rezultuar pozitivë në COVID-19.
E ndonëse numri i atyre që kanë rezultuar pozitivë vazhdon të jetë i lartë, drejtori i IKSHPK-së, Naser Ramadani, ka thënë se ata po shpresojnë se gjatë ditëve në vazhdim lakorja e rasteve do të shkojë duke u ulur. Derisa vendi, sipas Ramadanit, duhet të fillojë të përgatitet për valën e dytë në vjeshtë.
Gjatë një vizite që ka zhvilluar ministri i Shëndetësisë, Armend Zemaj, në Gjakovë ka thënë se Kosova është në rrugë të mbarë sa i përket uljes së rasteve, raporton KOHA.
Por spitalet dhe klinikat e QKUK-së, sipas ushtruesit të detyrës së drejtorit të SHSKUK-së, Valbon Krasniqi, vazhdojnë të jenë të stërmbushura me pacientë.
Të dhënat e Institutit Kombëtar të Shëndetit Publik tregojnë se Prishtina vazhdon të jetë në krye të listës sa u përket qyteteve të të prekurve, me 56 raste të konfirmuara.
Në Kosovë deri më tani janë mbi 10 mijë persona të konfirmuar me COVID-19, ndërsa rreth 4 mijë raste mbesin aktive.
-
Nga: Donika Voca Gashi
-
13 gusht 2020 19:04
-
Shpërndaje në: