Pas mocionit që e rrëzoi nga qeverisja, Lëvizja Vetëvendosje po e synon t’ia bëjë të njëjtën Lidhjes Demokratike të Kosovës, ish-partner i saj në Qeverinë Kurti.
Partia opozitare ka nisur mbledhjen e nënshkrimeve për mocionin e mosbesimit ndaj Qeverisë Hoti, së cilës i referohen si ilegale, derisa si arsye kanë përmendur edhe menaxhimin e dobët me pandeminë, rikapjen e shtetit e nënshtrimin, sipas tyre, ndaj Serbisë.
Shefi i Grupit parlamentar të kësaj partie, Rexhep Selimi, tha se presin që t’i sigurojnë 61 vota të nevojshme, përfshirë edhe nga deputetë të pozitës, që tashmë janë kritikë ndaj Ekzekutivit, raporton KOHA.
Deputetja e VV-së, Arbërie Nagacvi, e ka quajtur antikushtetuese dhe jolegjitime Qeverinë Hoti.
Për mbajtjen e seancës, për ngritjen e mocionit të mosbesimit nevojiten 40 vota, e Nagavci ka thënë se tashmë i kanë 31 vota, duke aluduar në numrin e deputetëve që VV-ja ka në Grup parlamentar.
Ndërkohë partia opozitare, PDK, ende nuk ka një qëndrim sa i përket votimit ose jo të mocionit të kërkuar nga VV-ja.
Deputetja e kësaj partie, Blerta Deliu - Kodra tha se strukturat e partisë së saj ende s’e kanë diskutuar këtë çështje, por që prioritet për ta mbetet lufta kundrejt pandemisë Covid – 19.
Një gjë të tillë e ka theksuar edhe shefi i Grupit parlamentar të PDK-së, Bedri Hamza, i cili në një deklaratë për media ka thënë se varësisht nga serioziteti i kësaj nisme do të veprojë edhe PDK-ja.
Por, burime brenda kësaj partie i kanë thënë portalit Koha.net se nëse një nismë e tillë mbërrin në seancë, ata do të votojnë për rrëzimin e Qeverisë Hoti.
Në mars të këtij viti, pas një serie përplasjesh me njëra-tjetrën, ish- Qeveria Kurti ishte rrëzuar me ngritjen e mocionit të mosbesimit pikërisht nga LDK-ja, partner i atëhershëm i saj.
© KOHA. Të gjitha të drejtat janë të rezervuara.
