Një numër i vogël i qytetarëve ka mbajtur protestë kundër ndërtimit të xhamisë së madhe në Lagjen “Dardania” në Prishtinë.
Në anën tjetër të rrugës është zhvilluar një protestë që përkrahnin ndërtimin e xhamisë dhe kundër protestës.
Për një moment, situata ishte tensionuar pak dhe protesta ka mundur fare lehtë të eskalojë, raporton KOHA.
Por, vetë organizatori i saj, Binak Gashi, veteran i UÇK-së, nuk ka qenë prezent.
Të pranishmit kanë thënë se nuk janë kundër xhamive, por kundër modelit që është përzgjedhur e që, sipas tyre, paraqet kulturën otomane. Ata e kanë quajtur këtë objekt fetar edhe politik.
Protestuesit që përkrahnin ndërtimin e Xhamisë kanë thënë se mjetet me të cilat po ndërtohet ajo nuk janë nga buxheti i Kosovës.
Sipas tyre, është e pakuptimtë që komandantë të UÇK-së të dalin kundër ndërtimit të xhamive.
Grupi i parë i protestuesve kërkoi ndërprerjen e punimeve rreth ndërtimit të kësaj xhamie, ndërsa grupi i dytë është zotuar se nuk do të lejojë një gjë të tillë.
© KOHA. Të gjitha të drejtat janë të rezervuara.
