Derisa vendi vazhdon të përballet me pandeminë COVID-19, Qeveria e ka konsideruar të panevojshëm projektligjin për të.
Kabineti qeveritar unanimisht e përkrahu opinionin se Ligji për menaxhimin dhe parandalimin e pandemisë është i panevojshëm, raporton KOHA.
Me opinionin u pajtua edhe ministri i Shëndetësisë, Armend Zemaj, që pak ditë më parë tha se përkrahin një iniciativë për ligj që erdhi nga kryetarja e Parlamentit, Vjosa Osmani.
Qasjen ndaj këtij ligji të Qeverisë, që e quan ilegale, e ka kritikuar edhe deputeti i Lëvizjes Vetëvendosje, Fitim Uka.
Për Betim Musliun nga Instituti i Kosovës për Drejtësi, refuzimi që të procedohet me këtë ligj po ndodh shkaku i inateve politike.
Hartimi i ligjit të veçantë përmes së cilit do të rregulloheshin disa prej çështjeve që lidhen me menaxhimin e pandemisë ishte kërkesë e Gjykatës Kushtetuese, e cila muaj më parë i kishte vlerësuar antikushtetuese disa prej vendimeve të marra nga ish-kryeministri Albin Kurti.
Me gjithë vendimin e Qeverisë, kryeparlamentarja Vjosa Osmani ka kërkuar nga deputetët që ta përkrahin iniciativën dhe të votojnë mocionin, i cili do të mundësonte shqyrtimin e projektligjit për pandeminë, me shmangie procedurale, porse një gjë e tillë nuk i mori votat e nevojshme.
© KOHA. Të gjitha të drejtat janë të rezervuara.
