Një ditë para mbajtjes së seancës ku është planifikuar të miratohen marrëveshjet ndërkombëtare, Partia Demokratike e Kosovës ka ndryshuar qëndrimin ndaj tyre.
Derisa në seancën e mbajtur para më shumë se dy javësh, PDK-ja ishte kundër ratifikimit të tyre, këtë të mërkurë shefi i deputetëve të kësaj partie, Bedri Hamza, ka thënë se një gjë të tillë tani do ta përkrahin pa ndonjë kusht.
Por PDK-ja së bashku me Vetëvendosjen gjatë së mërkurës nuk përkrahën rishikimin e buxhetit për vitin 2020, raporton KOHA.
Procedimi i tij për në Kuvend është bërë pa përkrahjen e tyre nga Komisioni për Financa dhe Transfere.
Në mbledhjen e këtij komisioni, ministrja e Financave dhe Transfereve, Hykmete Bajrami, tha se rishikimi i buxhetit do të mundësonte ekzekutimin e mjeteve nga Pakoja emergjente.
Të enjten, Kuvendi i Kosovës pritet të mbajë tri seanca, në mesin e tyre edhe ajo për ratifikimin e pesë marrëveshjeve ndërkombëtare.
© KOHA. Të gjitha të drejtat janë të rezervuara.
