Kryeministri Avdullah Hoti u ka bërë thirrje të gjitha grupeve parlamentare dhe deputetëve të Kosovës që sa më parë të caktohet seanca për rishikimin e buxhetit.
Hoti ka thënë se është e një nevoje urgjente mbajtja e seancës për këtë çështje, që të zbatohet sa më shpejt pakoja e rimëkëmbjes ekonomike.
Këto deklarata, kryeministri i vendit i bëri gjatë së shtunës, në vizitën e tij në fshatin Shirokë të Suharekës, në fillimin e fushatës së korrje-shirjeve, raporton KOHA.
Gjatë vizitës në këtë fshat, ministri i Bujqësisë, Besian Mustafa, tha se do të ndihmojnë në subvencionimin e grurit dhe kulturave të ndryshme bujqësore.
Edhe pse u shpreh i kënaqur me rendimentet e këtij viti, bujku Nisret Bajraktari, përkundër vizitës së krerëve komunalë e qendrorë, tha se bujqit kanë shumë pak përkrahje nga të dyja nivelet.
Ndërkohë që kryetari i Komunës së Suharekës, Bali Muharremaj, në këtë takim me kryeministrin e ministrin ka apeluar që sa më shpejt të ndahen subvencionet në këtë drejtim.
Hoti ka theksuar se ky vit ka treguar më së miri se sa e rëndësishme është që Kosova t’i ketë prodhuesit e vet, derisa ka premtuar se Qeveria do të jetë pranë bujqve për t’i ndihmuar ata me problemet e tyre.
© KOHA. Të gjitha të drejtat janë të rezervuara.
