Njoftimi i Zyrës së Prokurorit të Specializuar për dorëzimin e aktakuzës ndaj presidentit Hashim Thaçi dhe kryetarit të PDK-së, Kadri Veseli, ka qenë çështja me të cilën kryeministri Avdullah Hoti ka nisur mbledhjen e ekzekutivit.
Hoti ka thënë se lufta e UÇK-së ka qenë e pastër.
Edhe mbledhja e nëntë e Qeverisë nuk ka kaluar pa keqkuptime mes anëtareve të kabinetit qeveritar.
Ndaj propozimit për themelimin e këshillit ndërministror për përzgjedhjen e projektit për kompleksin “Adem Jashari”, ka reaguar zëvendëskryeministrja nga radhët e Nismës, Albulena Balaj - Halimi, e propozuar për kryesuese, që kërkoi të mos merret vendimi sot duke u ankuar se s’ishte konsultuar mjaftueshëm për një vendim të tillë, raporton KOHA.
Në këtë mbledhje, ndër të tjerash, kabineti qeveritar ka marrë vendim për bartjen e Agjencisë së Statistikave nga Zyra e kryeministrit në Ministrinë e Financave.
Përveç kësaj, ekzekutivi ka miratuar edhe një varg propozimesh të cilat kryesisht ndërlidhen me formimin e këshillave e komisioneve nëpër disa ministri.
© KOHA. Të gjitha të drejtat janë të rezervuara.
