Ngritja e aktakuzës nga Zyra e Prokurorit të Specializuar për krime lufte ndaj presidentit Hashim Thaçi e kreut të PDK-së, Kadri Veseli, solli kryeministrin shqiptar, Edi Rama, në Kosovë.
Me të mbërritur në Prishtinë, nëpërmjet Twitterit, kryeministri Edi Rama e quajti njollë të historisë aktakuzën ndaj Thaçit e Veselit, raporton KOHA.
“Në Prishtinë për të dëgjuar dhe mësuar më shumë pas fletë-rrufesë speciale, që do të hyjë si njollë turpi e shekullit XXI në historinë botërore të drejtësisë, e cila praktikën e akuzës publike pa aktakuzë juridike e ka njohur veç në epokat e sundimeve ideologjike a para tyre”, ka shkruar ai.
Takimet i nisi me kreun e Nismës Socialdemokrate, Fatmir Limaj. Rama ishte i shoqëruar edhe nga ushtruesi i detyrës së ministrit të Jashtëm, Gent Cakaj.
Rama erdhi në Prishtinë me masa të rrepta sigurie, e u karakterizua edhe një herë tjetër me veshjen e tij.
Asnjëri prej tyre nuk u deklarua për media.
Por, muhabetin e vazhduan pak metra larg selisë së partisë, ku drekuan në njërin prej restoranteve.
Në Facebook, Limaj ka shkruar se me Ramën diskutuan për situatën politike, pas aktivizimit të punës së Speciales.
Kryeparlamentarja Vjosa Osmani ishte nikoqire e radhës e kryeministrit shqiptar, Edi Rama.
As në këtë takim nuk pati deklarim për media.
Takimet me krerë institucionalë e partiakë, Rama i vazhdoi me kryeministrin Avdullah Hoti. Madje, mediat nuk u lejuan të filmojnë as brenda takimit gjysmorësh.
Kryeministri shqiptar, Edi Rama, ka vite që nuk ka qenë zyrtarisht në Kosovë.
© KOHA. Të gjitha të drejtat janë të rezervuara.
