Thaçi të dielën flet për akuzat ndaj tij, juristët presin dorëheqje morale
1
Dy ditë pas ngritjes së aktakuzës nga Zyra e Prokurorit të Specializuar për krime lufte, presidenti Hashim Thaçi, ka vendosur ta thyejë heshtjen.
Qëndrimin për këtë aktakuzë, Thaçi ka paralajmëruar se do ta bëjë të ditur të dielën në mbrëmje në një adresim për media.
Thaçi ishte nisur për në Uashington për takimin e së shtunës në Shtëpinë e Bardhë, e që më pas u anulua, pas njoftimit se u akuzua nga Zyra e Prokurorit të Specializuar.
Nga kryeqyteti austriak, në mesditën e së premtes Thaçi ka mbërritur në Tiranë, raporton KOHA.
“Motra dhe vëllezër, miq të dashur. Sapo kam zbritur në Aeroportin “Nëna Tereza” në Tiranë, ndërkaq, të dielën në mbrëmje do t’ju drejtohem me një fjalë nga zyra ime. Ju uroj një fundjavë të qetë dhe mbetem me shpresë të plotë se ditët më të mira për Kosovën dhe kombin shqiptar i kemi përpara. Gjithmonë i juaji, deri në fund”, ka shkruar Thaçi.
Pak orë para këtij postimi, Thaçi, po në Facebook, ka shkruar se askush nuk mund ta rishkruajë historinë e Kosovës.
Por, njohës të politikave në Ballkan, aktakuzën ndaj Thaçit e lidhin me procesin e bisedimeve dhe marrëveshjen finale mes Kosovës e Serbisë.
“As unë e askush nga Bashkësia ndërkombëtare nuk kemi qenë të befasuar me aktakuzën ndaj Thaçit dhe Veselit. Gjithashtu, është i qartë presioni që Thaçi ka vendosur në tre vjetët e fundit mbi dialogun dhe privatizimin e këtij procesi. Duke shtyrë përpara një shkëmbim territoresh, ai ka treguar qartazi frikën e tij se do të akuzohet dhe ka provuar të shmangë një aktakuzë të tillë”, ka thënë Bodo Weber, analist politik në Këshillin Gjerman për Demokratizim.
Weber e ka quajtur të pazakontë publikimin e emrave të të akuzuarve nga Specialja, por e ka arsyetuar këtë veprim të tyre.
“Ata kanë parë përpjekjen e Thaçit dhe të Veselit për të nënvlerësuar punën e Speciales dhe lidhja me takimin e Uashingtonit është e qartë. Thaçi me idenë e tij të shkëmbimit të territoreve ka provuar dhe ka pasur qëllim t’i sigurojë vetes amnisti dhe kështu, Zyra e Prokurorit të Specializuar me siguri ka qenë e frikësuar se kjo mund të jetë pjesë e ndonjë diskutimi në Uashington”, ka deklaruar ai.
Ai ka shtuar se pozita e Kosovës qoftë në Uashington apo Bruksel, do të jetë më e dobët me prezencën e Thaçit në tavolinë të bisedimeve, por tha se vendimi për dorëheqje i takon atij dhe spektrit politik në Kosovë.
Ndërkaq, juristët Kushtrim Palushi e Betim Musliu presin nga presidenti Hashim Thaçi që të japë dorëheqje morale.
Aktakuza ndaj Thaçit, e cila ende nuk është e konfirmuar, sipas tyre, nuk përbën pasojë juridike për të dhënë dorëheqje.
Presidenti i Serbisë, Aleksandar Vuçiq, tha se ai dhe serbët duhet të vetëpërmbahen në lidhje me aktakuzën ndaj presidentit Hashim Thaçi.
Në një paraqitje para gazetarëve në Bruksel, Vuçiqi ka shtuar se këtë po e bën për siç thotë ai, për të “mbrojtur serbët që janë në Kosovë”.
