Video

MSH: Testi negativ për koronavirus s’është obligativ për të hyrë në Kosovë

Ndonëse që nga 1 qershori e deri më 23 qershor në Kosovë u konfirmuan me Covid-19, 1 mijë e 184 persona, në po këtë muaj u larguan pothuajse të gjitha masat që ishin kundër përhapjes së koronavirusit.

Madje nga kjo e diel edhe Aeroporti i Prishtinës do të hapet, por testi që tregon se udhëtaret janë negativë nuk është i obligueshëm, por vetëm rekomandohet ta kenë.

Kurse në fillim të muajit korrik është paralajmëruar edhe lejimi i ahengjeve, raporton KOHA.

Në një postim në Facebook kryeministri i Kosovës, Avdullah Hoti, tha se më 1 korrik përfaqësuesit e estradës dhe hotelerisë do të takohen me Ministrinë e Shëndetësisë për të vlerësuar nëse ka kushte që të zhvillohen aktivitete të tilla.

E lehtësimin e tërësishëm të masave e ka kritikuar Shoqata e të Drejtave të Pacientëve në Kosovë, e cila ua ka drejtuar nga një letër Qeverisë së Kosovës dhe Ministrisë së Shëndetësisë që të mos lejojnë mbajtjen e ahengjeve në kohën kur Kosova po përballet me rritje të numrit të të infektuarve.

Nga 85 personat që janë duke u trajtuar në Klinikën Infektive, e që janë të infektuar

me Covid-19, 6 nga ta vazhdojnë të jenë në gjendje të rëndë shëndetësore.

Nga fillimi i marsit, kur janë konfirmuar rastet e para me Covid-19, në Kosovë janë gjithsej 2 mijë e 268 raste, prej tyre 1 mijë e 108 janë shëruar.