Një tjetër proces zgjedhor i Serbisë do të mbahet brenda territorit të Kosovës të dielën.

Një nga banorët e paktë serbë që pranojnë të flasin për këtë çështje thotë se nuk do të marrë pjesë në këto zgjedhje, pasi jeton në Kosovë e jo në Serbi.

Lejen për organizimin e zgjedhjeve parlamentare të Serbisë në komunat e banuara me shumicë nga serbët e ka dhënë Qeveria e Kosovës, raporton KOHA.

Kryeministri Avdullah Hoti ka thënë se këtë vendim e kanë bazuar në praktikat e qeverive të më hershme.

Për Serbinë, grumbullimin e votave nga Kosova do ta bëjë Organizata për Siguri dhe Bashkëpunim në Evropë (OSBE).

Ky mision, i pyetur nga televizioni se si planifikon të ofrojë siguri për votuesit në kohën e rritjes së numrit të infektimeve me virusin COVID-19, ka thënë se janë marrë të gjitha masat mbrojtëse për qytetarët.

Për shkak të rrezikut nga përhapja e pandemisë, presidenti i Kosovës, Hashim Thaçi, ka shtyrë datën e zgjedhjeve në komunën veriore të Mitrovicës, pasi ish-kryetari i saj u emërua zëvendëskryeministër në Qeverinë Hoti.

Megjithatë, Thaçi nuk ka përmendur rrezikun e përhapjes së koronavirusit gjatë mbajtjes së zgjedhjeve serbe në Kosovë, kur u ka bërë thirrje shqiptarëve të Luginës së Preshevës që masivisht t’i votojnë partitë shqiptare.