Më pak se një javë para se Kosova dhe Serbia të ulen në tavolinën e bisedimeve në Shtëpinë e Bardhë, i dërguari i posaçëm amerikan për dialogun, Richard Grenell, ka thënë se ideja e shkëmbimit të territoreve nuk do të jetë temë diskutimi.
Në intervistën dhënë televizionit “Fox News”, ndërmjetësuesi amerikan ka theksuar kjo ishte ide e ish-këshilltarit për siguri kombëtare, John Bolton.
Grenelli e ka cilësuar takimin e 27 qershorit Kosovë-Serbi mundësi për marrëveshje historike, raporton KOHA.
“Kur jemi te Kosova dhe Serbia, ne do t’i kemi të dyja palët në Shtëpinë e Bardhë të shtunën e ardhshme për të folur rreth një marrëveshjeje historike për lëvizje përpara. Unë në mënyrë konstante po luftoj kundër thashethemeve për shkëmbim të territoreve. Por kjo nuk është politika e Trumpit. Por kur gjurmoni më shumë, të dyja palët thonë mirë, po kjo është ajo që Bolton ka thënë. Kështu unë po luftoj thashethemet, pasi Boltoni ndiqte politikën e tij, jo të Trumpit”, ka thënë Grenell.
Zyra e Grenellit ka konfirmuar se temë diskutimi në takimin e 27 qershorit do të jenë çështjet ekonomike.
Por, njohës të proceseve politike në vend, thonë se ky takim do të jetë para se gjithash politik, për t’i hapur rrugë arritjes së marrëveshjes përfundimtare mes dy shteteve.
Visar Xhambazi nga Demokracia për Zhvillim, thotë se Kosova po shkon në këtë takim tërësisht e çakorduar dhe e papërgatitur.
Xhambazi pret që marrëveshjet e interesit të nënshkruara muaj më parë për linjën rrugore, hekurudhore dhe ajrore të finalizohen në Shtëpinë e Bardhë.
Më 27 qershor do të rinisin bisedimet Kosovë-Serbi të ndërmjetësuara nga SHBA-ja.
Bashkimi Evropian nga ana tjetër synon që të dyja shtetet t’i ftojë në takim në Bruksel.
Datën e takimit, Miroslav Lajçak, emisar i BE-së për dialogun, ka thënë të enjten në Prishtinë se do ta bëjë të ditur pas vizitës që do ta ketë javën e ardhshme në Beograd.
Ndërkohë, gjatë mesit të korrikut, është konfirmuar mbajtja e Samitit të Parisit për çështjen e dialogut Kosovë-Serbi.
© KOHA. Të gjitha të drejtat janë të rezervuara.
