Heqja e masave të reciprocitetit është cilësuar si vendim i pashembullt i qeverisë Hoti nga ish-kryeministri i Kosovës, Albin Kurti.

Lideri i Lëvizjes Vetëvendosje e ka quajtur ekzekutivin e ri si të varur politikisht nga Serbia dhe e ka përsëritur kërkesën për zgjedhje të reja.

Ai ka thënë se e sheh si të pakuptimtë që të hiqet e drejta sovrane e Kosovës për raportet me fqinjët, siç i ka quajtur ai, me sjellje armiqësore ndaj vendit, raporton KOHA.

Zhvillimet e fundit i ka komentuar edhe kryetari i AAK-së, Ramush Haradinaj, i cila ka thënë se e mirëpret fillimin e dialogut me Serbinë.

Porse ka shtuar që duhet t’u bëhet e qartë të gjithëve se Kosova nuk guxon të marrë pjesë në një tavolinë ku diskutohet për kufijtë dhe ndryshimin e territoreve.

Për vazhdimin e mundshëm të dialogut ka folur edhe presidenti i Serbisë, Alekasndar Vuçiq.

Ai ka thënë se atyre do t’u kërkohet që të pranojnë Kosovën si shtet të pavarur dhe se ata nuk do t’i thonë ‘’jo’’ Grenellit.

Presidenti serb ka shtuar se as Gjermania e as Britania e Madhe nuk do të ndryshojnë qëndrimin e tyre lidhur me statusin e Kosovës, duke shtuar se atyre po u bëhet presion nga të gjithë për të gjetur një zgjidhje.