Pa mbështetje të Komisionit për Buxhet dhe Transfere është proceduar për në seancë parlamentare kërkesa e Qeverisë për tejkalimin e përkohshëm të rregullave fiskale të deficitit nga 2 për qind në 6.5 për qind dhe uljen e bilancit bankar në 3.3 për qind.
Ministrja e Financave, Hykmete Bajrami, ka thënë se është e domosdoshme aprovimi i kësaj kërkese pasi, në të kundërtën, nuk do të mund të zbatohen të dyja pakot, ajo emergjente, si dhe pakoja e rimëkëmbjes, raporton KOHA.
Por kjo kërkesë nuk është përkrahur nga deputetët e Lëvizjes Vetëvendosje. Sipas tyre, Qeveria e re do të duhej që të bënte zvogëlimin e shpenzimeve e jo t’i rriste ato duke angazhuar punëtorë, e më pas të kërkonte rritje të deficitit.
Megjithatë, deputetët e pozitës kanë insistuar që kjo kërkesë të aprovohet pasi, siç kanë thënë, për të alookuar mjetet për Pakon e miratuar nga ish-Qeveria Kurti duhet të bëhet ky tejkalim i rregullave fiskale.
Por, pas hedhjes në votim për këtë votuan vetëm 3 deputetë, ndërsa kundër ishin 3 të tjerë. Deputeti Gazmend Abrashi ka kërkuar disa herë nga kryetari i Komisionit që të hidhet edhe një herë në votim, pasi në momentin e votimit nuk ishte e pranishme deputetja Verica Ceranic.
Murati nuk ka pranuar që ta hedhë atë në votim. Për këtë kërkuan ndihmën edhe nga sekretari i Kuvendit, Ismet Krasniqi, por edhe ai ka thënë se në momentin e votimit është e nevojshme vetëm të ketë kuorum.
© KOHA. Të gjitha të drejtat janë të rezervuara.
