Deri në orët e pasdites 15 kamionë me mallra nga Serbia nuk janë lejuar të hyjnë në territorin e Kosovës. Kjo për shkak se Kosovës në dokumentet e tyre nuk i referoheshin si Republikë, kërkesë e Qeverisë në detyrë.
Zëdhënësi i Doganave të Kosovës, Adriatik Stavileci, ka thënë se të gjitha kthimet “kanë të bëjnë me aplikimin e masave të reciprocitetit sipas vendimit të Qeverisë”.
“Të gjitha kthimet kanë të bëjnë me aplikimin e masave të reciprocitetit sipas pikës 1, respektivisht 1.1 dhe 1.3, dhe gjithashtu edhe pikës 3 të vendimit të Qeverisë”, ka deklaruar ai.
Përveç referimit të Kosovës si shtet, vendimi për shtim të masave të reciprocitetit, i marrë të shtunën, kërkon prej operatorëve ekonomikë nga Serbia që të pajisen me leje hyrëse për secilin automjet të transportit të mallrave që hyn në Republikën e Kosovës nga Zyra Ndërlidhëse e Republikës së Kosovës në Serbi.
© KOHA. Të gjitha të drejtat janë të rezervuara.
