LDK-ja pret vendimin e plotë për të vazhduar me votim të Qeverisë, VV-ja nis peticion për zgjedhje

Kurse kreu i partisë, Isa Mustafa, ka përsëritur se për të respektuar Gjykatën Kushtetuese, LDK-ja nuk aktivizon kërkesën për seancën e formimit të qeverisë pa u publikuar aktgjykimi i plotë për mandatarin, raporton KOHA.

“Po e presim Aktgjykimin e kompletuar të Gjykatës Kushtetuese për ta aktivizuar kërkesën e deputetëve të koalicionit në krye me LDK-në për thirrjen e Seancës së Kuvendit për zgjedhjen e Qeverisë së re. Jo se nuk e kemi të qartë Aktgjykimin, por se jemi të interesuar të respektojmë Gjykatën Kushtetuese dhe të gjitha procedurat demokratike”, ka thënë Mustafa.

Për ta kompletuar aktgjykimin, Kushtetuesja po punon edhe në ditët e pushimit të fundjavës, ashtu siç veproi edhe kur pezulloi dekretin e Presidentit pas kërkesës së Vetëvendosjes.

“Si edhe në vitet e para pas themelimit të Gjykatës, gjatë trajtimit të rasteve me prioritet dhe për shkak të rëndësisë që ka ky aktgjykim për zhvillimet aktuale në vend, gjyqtarët dhe zyrtarët e Gjykatës Kushtetuese do të vazhdojnë punën në finalizimin e përmbajtjes së plotë të aktgjykimit edhe gjatë vikendit, kur edhe pritet të publikohet aktgjykimi (ose më së largu në fillim të javës së ardhshme”, thuhet në përgjigjen e Gjykatës për KOHËN.

Lëvizja Vetëvendosje paralajmëron se nuk do të lejojë formim të qeverisë së re pa zgjedhje, por kjo, sipas LVV-së, do të bëhet përmes rezistencës paqësore.

Zgjedhjet do të kërkohen përmes një peticioni në internet.

Mënyra e kundërshtimit të votimit të Qeverisë së re, sipas deputetit Liburn Aliu, do të shihet në seancë derisa thotë se mund të mos ketë nevojë për përdorim të gazit lotsjellës.

Aliu ka shtuar se nuk përjashtohen si mundësi as protestat, por që për momentin, sipas tij, nuk ka nevojë për organizimin e tyre.

© KOHA. Të gjitha të drejtat janë të rezervuara.