Rreth 300 persona nga vendet e rajonit pritet që të kthehen në Kosovë, këtë të mërkurë.
Disa prej tyre do të karantinohen në Qendrën e Studentëve në Prishtinë, derisa vetëm personat që bëjnë pjesë në kategoritë që janë të liruar nga karantinimi do të vetizolohen.
Këtë, për KOHËN, e kanë konfirmuar zyrtarë të Ministrisë së Infrastrukturës, derisa kanë treguar se pritet të realizohet edhe një fluturim nga Italia më 31 maj.
Të hënën gjatë një vizite, në Qendrën e Studentëve në Prishtinë, kryeministri Albin Kurti duke mos dhënë shumë detaje, ka thënë se karantina parashihet të mbyllet në fund të muajit maj, pasi që gjendja me pandeminë COVID-19 është përmirësuar.
Derisa nga Ministria e Shëndetësisë për KOHËN kanë thënë se personat që do të hyjnë në Kosovë, pas mbylljes së karantinës, sipas nevojës do të vetizolohen.
Mjekët, të cilët për këta dy muaj qëndruan përkrah personave të karantinuar, tregojnë për vështirësitë që kanë pasur gjatë kësaj kohe.
Mjeku Valdet Hashani ka treguar se për momentin janë rreth 120 persona të karantinuar në Qendrën Studentore, dhe se disa prej tyre do të testohen në ditët në vazhdim.
Ministria e Shëndetësisë ka vendosur që nga kjo e enjte t’i hapë objektet fetare, dhe ka zgjatur lëvizjen e qytetarëve, ende nuk është vendosur për hapjen e kufijve tokësorë e Aeroportit.
© KOHA. Të gjitha të drejtat janë të rezervuara.
