Shembja e objektit të Teatrit Kombëtar në Tiranë ka bërë që qindra qytetarë të protestojnë në rrugët e Tiranës, në këtë kohë pandemie.
Gjatë kësaj proteste, e cila filloi mëngjesin e së dielës, pati edhe përleshje mes protestuesve e policisë, derisa një polic është lënduar, e më shumë se 30 persona janë shoqëruar për në stacionin policor, në mesin e tyre edhe artistë.
Pas shembjes së këtij objekti dhe lidhur me protestën, kryeministri Edi Rama ka zgjedhur që përmes një videoje në Facebook të tregojë se protestuesit që kundërshtonin rrënimin nuk e duan zhvillimin e kryeqytetit.
Sipas Ramës, protestuesit janë të njëjtit persona që kanë protestuar edhe për projekte të tjera madhore. Në këtë protestë kundër shembjes së teatrit janë parë edhe përfaqësues të opozitës.
Lidhur me këtë ka reaguar edhe Zyra e Bashkimit Evropian në Tiranë.
"Prishja e Teatrit Kombëtar erdhi në një kohë kur ne kërkuam dialog midis autoriteteve dhe shoqërisë civile para se të merrej një vendim i pakthyeshëm. Na vjen keq që kjo thirrje nuk u ndoq nga institucionet përkatëse kombëtare dhe vendore", thuhet në këtë reagim.
Kundër dhunës së përdorur në protestë është shprehur edhe Ambasada britanike, derisa komentoi se dhuna cenon parimet themelore të demokracisë.
Ka më shumë se dy vjet që në Shqipëri vazhdon debati i ashpër lidhur me rrënimin apo jo të objektit të Teatrit Kombëtar. I njëjti debat është shtrirë edhe në Kosovë, ku shumë personalitete janë shprehur kundër rrënimit të këtij objekti ikonik.
Pas pothuajse dy vjetësh rezistencë nga ana e komunitetit artistik, në orët e para të mëngjesit të së dielës është shembur objekti monumental. Kryeministri i Shqipërisë, Edi Rama, më herët kishte deklaruar se do të ndërtohet një teatër i ri, më modern.
© KOHA. Të gjitha të drejtat janë të rezervuara.
