Ekspozenë për 100-ditëshin e parë të kësaj qeverie, kryeministri Albin Kurti e ka shfrytëzuar për ta kritikuar partnerin e koalicionit, LDK-në, për prishjen e marrëveshjes së bashkëqeverisjes.
Një gjë të tillë e ka bërë në prani të ministrave të LDK-së, raporton KOHA.
Megjithatë, Kurti ka lavdëruar ministrat pa dallim.
Por dy nga ministrat e LDK-së, Hykmete Bajrami dhe Lumir Abdixhiku, janë ndier të fyer nga fjalimi i Kurtit.
Ministrat e tjerë kanë folur gjatë për ato çka i quajnë suksese të 100-ditëshit të parë.
Është folur për domosdoshmërinë e procesit të vettingut e për atë se si nuk ka vendime përfundimtare për rastet e shënjestruara të korrupsionit, që ishin duke u monitoruar për procesin e liberalizimit të vizave.
Në fjalimin e tij Kurti ka thënë se qeveria e tij e ka pasur prioritet përballimin me pandeminë Covid-19, porse ka nisur çkapjen e shtetit me një sërë veprimesh kundër krimit e korrupsionit në institucione.
Pas këtij takimi, që ka zgjatur rreth 3 orë, kryeministri Kurti ka mbajtur konferencë për media.
Kurti ka folur për tubimin e së hënës që ishte quajtur “provë për protestë”.
Ka thënë se nuk i inkurajojnë tubimet, porse qytetarët duhet të jenë të lirë për aktivitete.
Ai është deklaruar edhe për dy aktgjykimet e Gjykatës Kushtetuese, të cilat ky institucion i ka cilësuar joligjore. Kurti ka minimizuar shkeljet me arsyetimin se janë procedurale.
Qeveria e Kosovës është votuar më 3 shkurt. Rreth 50 ditë pas LDK-ja ka iniciuar mocion mosbesimi me të cilin e ka shkarkuar qeverinë Kurti.
© KOHA. Të gjitha të drejtat janë të rezervuara.
