10 ditë pas paraqitjes së koronavirusit në Kosovë, shënohet viktima e parë

Pak më shumë se një javë pas paraqitjes së rastit pozitiv me COVID-19 është shënuar viktima e parë nga ky virus në Kosovë.

H.H. nga fshati Dumnicë e Epërme e Podujevës ka vdekur të dielën në Klinikën Infektive të QKUK-së.

82-vjeçari, i cili kishte pasur edhe sëmundje shoqëruese kronike, kardiake dhe sëmundje kronike mushkërore, ishte pranuar në Klinikë më 16 mars, raporton KOHA.

Rastin për KOHËN e ka konfirmuar djali i viktimës B.H., i cili tha se e ka përjetuar rëndë humbjen e babait.

Derisa në Klinikë janë edhe dy fëmijët e tjerë të H.H., të cilët janë të infektuar me koronavirus.

B.H. tutje ka thënë se vëllai dhe motra e tij janë në gjendje stabile.

“Vëllai edhe motra janë mirë. Ata nuk kanë probleme. Vëllai ka qenë në një dhomë me babën, aty i ka shërbyer deri në minutën e fundit”, ka thënë ai.

Djali i H.H. ishte i pari që kishte dalë pozitiv nga Komuna e Podujevës.

62-vjeçari kishte ardhur nga Italia më 5 mars, nëpërmjet aeroportit ndërkombëtar “Adem Jashari”.

Ndërkohë, pos viktimës së parë numri i përgjithshëm i të infektuarve me koronavirus në Kosovë ka mbërritur në 32, e 7 janë shënuar vetëm në 24 orët e fundit.

Instituti Kombëtar i Shëndetësisë Publike njoftoi se rasti pozitiv i fundit është një 31-vjeçar nga fshati Senik i Komunës së Malishevës.

Pos tij, edhe të tjerë persona në moshë të re janë infektuar.

Përgjithësisht në botë, sipas shkencëtarëve, të rinjtë janë shpërndarësit më të shpeshtë të koronavirusit për shkak se kanë më pak simptoma të theksuara dhe kështu vazhdojnë qarkullimin e zakonshëm duke e shpërndarë virusin tek kategoritë më të ndjeshme.

Rasti i parë i të infektuarit me koronavirus është paraqitur më 13 mars, derisa vazhdojnë të mbesin në karantinë disa komuna e fshatra të Kosovës.