Sot, vetëm një kamion me lëndë të parë nga Serbia hyri në Kosovë

21 March 2020 19:10

Në orët e hershme të së shtunës, ka hyrë në fuqi vendimi i Qeverisë për heqjen e taksës për lëndën e parë të mallrave që vijnë nga Serbia dhe Bosnja e Hercegovina.

Kamioni i parë që ka hyrë në Kosovë pas këtij vendimi, ka qenë nga Maqedonia.

Ndërsa, deri në mesditë, nga Serbia ka hyrë vetëm një kamion me lëndë të parë që përdoret për paketime, raporton KOHA.

Adriatik Stavileci, zëdhënësi i Doganës së Kosovës, ka bërë të ditur se gjatë 24 orëve të fundit, në vendin tonë kanë hyrë rreth 170 kamionë me mallra nga vende të ndryshme, por që kanë përdorur Serbinë si vend transit.

Ndërsa, nga Bosnja dhe Hercegovina, sipas tij, ende nuk ka hyrë ndonjë kamion me mallra të lëndës së parë.

Por, disa kamionë që kanë hyrë gjatë kësaj kohe në Kosovë, nuk janë lejuar nga autoritetet serbe të kthehen në Serbi. Këtë e ka konfirmuar Policia e Kosovës, por nga ky institucion kanë thënë se nuk i dinë arsyet e këtyre pengesave.

“Në pikën kufitare të Jarinjës janë rreth 20 kamionë, ndërsa në Bërnjak rreth 6 kamionë të cilët presin të hyjnë në Serbi. Arsyet e ndalesës së tyre ne nuk i dimë”, ka thënë Bajram Krasniqi, zëdhënës i Policisë së Kosovës.

Sipas të dhënave nga Dogana, para vendosjes së taksës, importi i lëndës së parë nga Serbia ka pasur vlerën e rreth 30 milionë eurove në vit.

© KOHA. Të gjitha të drejtat janë të rezervuara.

Të ngjashme