Kurti: Thaçi e shkeli Kushtetutën në letërkëmbimin me NATO-n për Veriun

26 February 2020 19:14

Ditën kur Hashim Thaçi i mbushi katër vjet në krye të Presidencës, kryeministri Kurti e ka pandehur atë për shkelje të Kushtetutës.

Shkas është bërë një marrëveshje e vitit 2013, ku Thaçi në cilësinë e kryeministrit të Kosovës ia ndalonte Forcës së Sigurisë të shkelë në veriun e populluar me shumicë serbe, raporton KTV.

Përmes kësaj marrëveshjeje, Thaçi në emër të Kosovës barti te KFOR-i të drejtën absolute të vetos mbi të gjitha misionet e ardhshme të FSK-së në veri, për një periudhë të pakufizuar.

Dokumenti i nënshkruar nga Thaçi dhe sekretari i NATO-s Anders Fogh Rasmussen, nuk ishte bërë publik. Shtatë vjet më vonë, atë e ka nxjerrë Qeveria e udhëhequr nga Albin Kurti. Përveç mediave, Kurti ua ka përcjellë dosjen për analizë kryetares së Kuvendit, Vjosa Osmani, si dhe kryeprokurorit të Shtetit, Aleksandër Lumezi.

Disa orë më vonë, në konferencën e parë të jashtëzakonshme si kryeministër, Kurti tha se dyshon që Thaçi njëanshëm ia ka ofruar marrëveshjen sekretarit të NATO-s.

Për Kurtin kjo marrëveshje mund të ketë qenë parapërgatitje për zbatimin e opsionit të cilin do ta lansonte Thaçi më vonë- atë të korrigjimit të kufijve me Serbinë.

Marrëveshja që ia ndalonte FSK-së shkuarjen në veri ishte nënshkruar më 19 prill 2013, në të njëjtën ditë kur Thaçi e ish-homologu serb, Ivica Daçiq, nënshkruan marrëveshjen 15-pikëshe për normalizimin e marrëdhënieve mes dy vendeve.

Edhe pse është pyetur disa herë, kryeministri nuk ka treguar nëse do ta shfuqizojë marrëveshjen dhe t’ia mundësojë FSK-së të shkojë në veri, pa e pyetur NATO-n.

Po ashtu nuk është përgjigjur nëse do t’i nisë procedurat për shkarkimin e presidentit.

Kurti vetëm ka thënë se u takon organeve të hetuesisë të merren me këtë çështje.

Ai ka komentuar edhe mundësinë që vetë ta vizitojë veriun dhe të dialogojë me serbët, ashtu siç pati premtuar gjatë fushatës parazgjedhore.

Në lidhje me marrëveshjen, KOHA ka pyetur selinë qendrore të NATO-s. Në një përgjigje zyrtare, ata kanë konfirmuar se FSK-ja në veri mund të shkojë vetëm me leje të komandantit të KFOR-it.

“Misioni ynë i KFOR-it ka dhënë një kontribut të rëndësishëm për stabilitetin e rajonit të Ballkanit Perëndimor për 20 vjetët e fundit. Këtë vit, ne shënojmë 20 vjet nga fillimi i KFOR-it. Misioni ynë mbetet i pandryshuar, bazuar në Rezolutën 1244 të Këshillit të Sigurimit të KB. Ne jemi atje për të mbajtur një mjedis të qetë dhe të sigurt për të gjithë njerëzit në Kosovë, dhe kjo është ajo që ne po bëjmë. Në të njëjtën kohë, pas vendimit për transicionin e Forcës së Sigurisë së Kosovës, ne tani po rishikojmë nivelin e angazhimit të NATO-s me FSK-në. Ky diskutim po vazhdon. Çfarëdo lëvizjeje e FSK-së në pjesën veriore të Kosovës kërkon njoftim paraprak dhe marrëveshje nga komandanti i KFOR-it. Për 20 vjet, paqja dhe stabiliteti në Kosovë kanë qenë prioritet për NATO-n. Mandati ynë nuk ka ndryshuar dhe ne do të vazhdojmë misionin tonë paqeruajtës. NATO gjithashtu mbështet rifillimin e dialogut të sponsorizuar nga Bashkimi Evropian ndërmjet Beogradit dhe Prishtinës si zgjidhja e vetme politike e qëndrueshme për rajonin”, thuhet në përgjigjen e NATO-s.

Para se t’i nxjerrë në opinion, Kurti ka thënë se këtë çështje planifikonte ta diskutonte fillimisht me Thaçin, por që ai nuk i është përgjigjur kërkesës për takim.

Zyra Ligjore e kryeministrit u ka bërë edhe një interpretim kushtetues, siç kanë thënë, shkeljeve të presidentit.

Sipas këtij interpretimi, presidenti ka shkelur nenin 20 të Kushtetutës, sipas të cilit ratifikimi i marrëveshjeve ndërkombëtare që kanë të bëjnë me sovranitetin e vendit duhet të kalojë përmes Kuvendit.

Aty, kjo shkelje konsiderohet si serioze e jo vetëm teknike, duke konsideruar se fakti që Thaçi atë kohë nuk ishte president nuk i jep imunitet nga ndjekja për shkelje të Kushtetutës.

Ndërkaq në letrën drejtuar kryetares së Kuvendit, Kurti ka kërkuar prej të gjithë deputetëve që ta trajtojnë çështjen me seriozitetin e duhur.

© KOHA. Të gjitha të drejtat janë të rezervuara.

Të ngjashme