Grupi për Studime Juridike dhe Politike i sugjeron Qeverisë Kurti 10 masa urgjente

12 February 2020 19:15

Dialogu në mes të Kosovës e Serbisë, duhet të vazhdojë të mbetet prioritet edhe i Qeverisë Kurti pavarësisht gatishmërisë apo preferencës për ta trajtuar apo jo atë si të tillë.

Kështu u tha gjatë një konference të Grupit për Studime Juridike dhe Politike, ku janë propozuar 10 masat më urgjente që duhet të marrë Qeveria Kurti.

Arbëresha Loxha, nga GLPS-ja vlerëson se Qeveria duhet të krijojë një grup punues gjithëpërfshirës për dialogun, në të cilën do të ftoheshin të marrin pjesë përfaqësues të të gjitha partive parlamentare.

Loxha duke kërkuar edhe publikimin e plan programit të Qeverisë Kurti, ka thënë se kjo qeveri duhet të ketë transparencë dhe llogaridhënie publike gjatë mandatit qeverisës.

E Përparim Kryeziu, duke kritikuar qeverisjen e kaluar, tha se emërimet e larta, si zëvendësministrat, këshilltarët politikë dhe sekretarët e përgjithshëm duhet të bëhen në bazë të kritereve të larta të përgatitjes dhe integritetit profesional.

Në 10 masat emergjente, GLPS-ja ka radhitur edhe rishikimin e licencave dhe lejeve ekonomike, siç janë ato për terminale doganore e homologim të veturave që sipas kësaj organizate janë të dyshimta meqenëse individë të caktuar të afërt me grupe politike në pushtet kanë përfituar ato në këmbim të favoreve financiare ose politike.

© KOHA. Të gjitha të drejtat janë të rezervuara.

Të ngjashme