Kurti s’e do Schengenin ballkanik, e Rama s’e do makro Schengenin shqiptar

Çështjes së mini Schengenit ballkanik, kryeministri Albin Kurti, i ka kushtuar kohë të shkurtër në takimin me kryeministrin Edi Rama, që vazhdon ta shtyjë përpara këtë ide.

Në vizitën e tij të parë zyrtare në Tiranë si kryeministër, ku u prit me ceremoni shtetërore, Kurti tha se takimi me Ramën, kishte një tjetër çështje në thelb, raporton KTV.

Megjithatë, Rama menjëherë ka reaguar se nuk mund të ketë makro Schengen shqiptar, pa Schengen ballkanik e nuk i ka pëlqyer që nismës së fundit, i referohen me ‘mini’.

Rama e Kurti, bënë të ditur se janë pajtuar për takimin e ardhshëm të qeverive, që pritet të mbahet në muajin mars në Shkodër, dhe nismën për formimin e një komisioni ndërshtetëror që do të vlerësojë zbatimin e 77 marrëveshjeve të arritura, dhe nevojën për arritjen e të rejave.

Interesimi i mediave në kryeqytetin shqiptar, ka qenë i jashtëzakonshëm pas deklaratës së Kurtit për makro Schengenin shqiptar, por ky i fundit, nuk është zgjeruar më shumë në këtë temë, pas takimit me kryetarin e Partisë Demokratike, Lulzim Basha.

Përveç Ramës e Bashës, Kurti në vizitën e parë jashtë Kosovës, takime të ndara ka pasur edhe me presidentin shqiptar Ilir Meta dhe kryetarin e Kuvendit, Gramoz Ruçi.