Me dyshimet se kishte vënë eksploziv të llojit TNT e që shkaktoi vdekjen e një polici e plagosjen e dy të tjerëve, Gjykata Themelore në Prizren të enjten i ka caktuar 30 ditë paraburgim Iran Badallit.
Por, në shtëpinë e të dyshuarit gjatë bastisjes Policia gjeti edhe 809 gramë eksploziv të pashpërthyer, por jo edhe substanca narkotike për çka kishte informata paraprake, raporton KTV.
Badalli një ditë më parë u arrestua me dyshimet se kishte kryer tri vepra penale.
Gjykata Themelore e Prizrenit i ka cilësuar të natyrës së rëndë të gjitha veprat penale për të cilat dyshohet Iran Badalli.
Gjithashtu, në caktimin e masës së paraburgimit ka ndikuar edhe e kaluara kriminale e tij.
Në mesin e shumë dosjeve kriminale që Badalli ka në Gjykatën e Prizrenit është edhe akuza për dhunën në familje, dhe një urdhër mbrojtjeje i lëshuar ndaj gruas së tij dhe familjes së saj.
Në gusht të vitit të kaluar, kjo gjykatë e kishte detyruar Badallin që të mos i afrohet
50 metra gruas në vendbanimin e saj e as vende publike për 6 muaj.
Atij gjithashtu i ishte ndaluar që t’i ofrohej edhe nënës dhe motrës së bashkëshortes së tij. Derisa fëmijët, sipas këtij urdhri, do t’i kalonin në kujdestari nënës, por babai do të kishte mundësi t’i takonte ata tre herë në muaj.
Megjithëkëtë, dy fëmijët e tij ishin në shtëpi në momentin e shpërthimit të martën, derisa njëri ka mbetur i lënduar.
Në seancën, e cila ishte mbajtur për caktimin e urdhrit të mbrojtjes, bashkëshortja e Badallit kishte thënë se ajo kishte përjetuar dhunë të vazhdueshme nga bashkëshorti i saj që pas lindjes së fëmijës së parë të tyre.
Në deklaratën e saj dhënë gjykatës, thuhet se pas dhunës së ushtruar në prani të fëmijëve, ajo në korrik të vitit të kaluar e kishte lajmëruar policinë.
Badalli në shkurt pritet të dalë para gjykatës për akuzat për dhunë në familje.
Në Gjykatën Themelore në Prishtinë ndaj Badallit figurojnë edhe 6 lëndë aktive për vepra të ndryshme kriminale, në mesin e tyre vjedhje e rëndë, vjedhje e shërbimeve komunale, vjedhje pylli dhe kanosje etj.
© KOHA. Të gjitha të drejtat janë të rezervuara.
