Tetë të akuzuarve në rastin “Syri i Popullit”, 41 vjet dënim

Dënimin unik prej 12 vjetësh e ka quajtur tradhti Avni Llumnica, e reagimi i tij këtë të mërkurë ka bërë që trupi gjykues të mos e lejojë brenda sallës ku u dha vendimi për rastin “Syri i Popullit”.

Ai është dënuar për hakmarrje, përgatitje të veprave terroriste dhe dhunim, vepër të cilën e kishte kryer gjatë kohës sa ka qenë në paraburgim, raporton KTV.

Pos Llumnicës, edhe 7 persona të tjerë të akuzuar në këtë rast, janë shpallur fajtorë.

Ata janë dënuar për akuzat e Prokurorisë Speciale për vepra terroriste ose penale kundër rendit kushtetues dhe sigurisë së Kosovës, si dhe vepra të tjera.

Sadri Ramabajës i është shqiptuar dënimi me 5 vjet burgim, Ragip Sallovës me 4vjet , e Rexhep Topllanës 2 vjet burgim.

Për mosparaqitje të veprës penale, me dy vjet burgim është dënuar Behxhet Luzha.

Halim Halimi dhe Bajrush Konjusha janë dënuar me nga 3 vjet heqje lirie, e ky i fundit edhe me 300 euro gjobë për armëmbajtje pa leje.

Kurse, të akuzuarin Murat Jashari, që tentoi ta vriste Azem Vllasin, Gjykata nuk e ka dënuar me burgim, por e ka detyruar që për 10 vjet të qëndrojë në mbajtje në trajtim të detyrueshëm psikiatrik.

Vendimi i ka revoltuar familjarët e të akuzuarve, me ç’rast në sallë janë dëgjuar të shara e, sipas tyre, mbrapa akuzës është klani “Pronto”.

Mbrojtësit e të akuzuarve kanë paralajmëruar ankesë ndaj vendimit, ndërsa i kanë konsideruar të ashpra dënimet.

Gjykimi në këtë rast, që kishte nisur më 2018-n, u mbajt disa herë me dyer të mbyllura, me kërkesë të Prokurorisë fillimisht për shkak se i akuzuari Avni Llumnica akuzohej edhe për “dhunim” .

Por, publiku u privua, gjithashtu, nga dëshmia e presidentit të Kosovës, Hashim Thaçi, me arsyetimin se ajo përmbante sekrete shtetërore.

Ky akuzoi Vetëvendosjen dhe udhëheqësit e saj se është mbrapa organizatës “Syri i Popullit”.

Sipas aktakuzës, organizata kishte për qëllim të kryente atentate ndaj zyrtarëve të lartë shtetërorë dhe ish-funksionarëve të viteve 1980-1991, që konsideroheshin si tradhtarë të popullit, në mesin e tyre: Hashim Thaçi, Kadri Veseli, Xhavit Haliti, Isa Mustafa por edhe personalitete tjera.

Qëllimi, sipas PSRK-së, ishte që të destabilizohej situata politike, ekonomike dhe kushtetuese në Kosovë.