VV-ja kërkon hetime kundër komunës së Prishtinës dhe Ministrisë së Mjedisit për ndërtimet në Badovc

Nisje të hetimeve ka kërkuar Lëvizja Vetëvendosje ndaj Komunës së Prishtinës dhe Ministrisë së Mjedisit për vendimet e tyre rreth ndërtimeve afër Liqenit të Badovcit.

VV-ja vlerëson këto dy institucione kanë shkelur ligjin kur kanë marrë vendimet që investitorëve t’u lëshohen kushtet e ndërtimit, raporton KTV.

Deputetja e VV-së, Fitore Pacolli ka thënë se me lëshimin e kushteve, Komuna i ka dhënë kompanisë mundësinë t’i plotësojë ato.

Ndërsa, këshilltari komunal i VV-së në Prishtinë, Eman Rrahmani, ka deklaruar se komuna është dashur t’i drejtohej gjykatës pas vendimit obligues rreth kushteve.

Kompania “KAWA Group”, që është një nga investitorët e këtij projekti, ka mohuar se janë bërë shkelje ligjore, derisa është shprehur e gatshme të bashkëpunojë me Prokurorinë, nëse ajo hap hetime për këtë rast.

“Në secilin rast, ne kemi qenë transparentë. Në secilin rast, kemi ndjekur hapat që parashihen. Komuna ka lëshuar Kushtet Ndërtimore, duke u bazuar në Planin Zhvillimor Komunal. Ne jemi të bindur që në asnjë rast nuk është shkelur ligji, pasi gjithçka është e qartë. Nëse prokuroria sheh se ka arsye për hetim, ne jemi të hapur pa asnjë problem për prokurorinë dhe secilin institucion shtetëror të Republikës së Kosovës”, ka thënë Uran Haxha nga “KAWA Group”.

Kohavisioni ka provuar të kuptojë nga Prokuroria Themelore në Prishtinë nëse ka në plan të nisë hetime për këtë rast, por kryeprokurori Kujtim Munishi, ka qenë i paqasshëm gjatë ditës.

Vetëvendosja i ka bërë thirrje MMPH-së të anulojë vendimin obligues ndaj komunës për lëshim të kushteve ndërtimore.