Himni botëror feminist është performuar edhe në Prishtinë

14 January 2020 19:24

Vargjet e një kënge u kënduan në shumë qytete botërore nga qindra e mijëra gra.

Los Angelos, pranë njërit prej muzeve kryesorë, në Paris pranë Kullës Eiffel dhe në Stamboll madje edhe brenda Parlamentit, raporton KTV.

Derisa deputetet turke kënduan vargjet e himnit, kolegët e tyre burra mbanin fotografitë e rreth 20 grave që ishin vrarë nga burra.

Kënga që shpejt u shndërrua në himn feminist, një kritikë ndaj sistemit shtetëror të heshtur përballë dhunës ndaj grave, ka mbërritur edhe në Prishtinë.

Dhjetëra gra i kënduan vargjet e njëjta, por të përkthyera në shqip, e gishtin e drejtuan kah parlamenti dhe qeveria e Kosovës.

“Në Kosovë, vetëm gjatë tre vjetëve të fundit janë vrarë 11 gra, si pasojë e dhunës në familje,” shkruhet në thirrjen për aktivitetin në rrjete sociale.

E në këta tre vjet, ka pasur 3 mijë e 394 raste të raportuar për dhunë ndaj grave, e më shqetësues mbetet edhe numri i rasteve të paraportuara.

Gjithashtu, sipas anketës së OSBE-së për mirëqenien dhe sigurinë e grave në Kosovë, 338 mijë gra kanë përjetuar një formë të ngacmimit seksual, përndjekjes, dhunë nga partneri intim, ose dhunë nga një burrë tjetër, përfshirë psikologjike, fizike ose dhunë seksuale që nga mosha 15 vjeç.

Himni “Un violador en tu camino” ose “Një dhunues në rrugën tënde” për herë të parë u performua në shtetin e Kilit, më 25 nëntor, Ditën Ndërkombëtare për eliminimin e dhunës kundër grave.

© KOHA. Të gjitha të drejtat janë të rezervuara.

Të ngjashme